ԱՄՆ-ի արտգործնախարարություն. «Թուրքիայի կողմից ձեռնարկված գործողությունները պատշաճ և համարժեք են եղել»
ՄԱԿ-ի Անվտանգության խորհուրդը «ամենախիստ եղանակով» դատապարտել է Սիրիայի հետ Թուրքիայի սահմանամերձ քաղաքներից մեկի ուղղությամբ կատարված հարձակումը:
Անվտանգության խորհրդի կողմից ընդունված հայտարարությունը կոչ է անում Սիրիայի կառավարությանը «հարգել հարևան պետությունների ինքնիշխանությունն ու տարածքային ամբողջականությունը»:
Այս առումով ՄԱԿ-ի Անվտանգության խորհրդում, որտեղ արդեն երկար ժամանակ առկա են տարաձայնություններ Սիրիայի նախագահ Բաշար ալ-Ասադի դեմ ուղղված՝ արդեն 18 ամիս շարունակվող ապստամբության կապակցությամբ գործողություններ ձեռնարկելու հարցում, գրանցվել է հազվադեպ միասնականություն:
Կարդացեք նաև
Նախագահ Ասադի դաշնակից Ռուսաստանն այնուամենայնիվ կոչ էր արել Անվտանգության խորհրդին ընդունել ավելի մեղմ հայտարարություն, մինչդեռ Ասադին ընդդեմ հանդես եկող Արևմուտքի պետությունները ցանկանում էին, որպեսզի հայտարարության վերջնական տարբերակը հնչեր հնարավորինս խիստ:
ԱՄՆ-ի արտգործնախարարության խոսնակ Վիկտորիա Նուլանդը հինգշաբթի օրն անցկացված մամուլի ասուլիսի ժամանակ ասել է, որ ՆԱՏՕ-ի անդամ և ԱՄՆ-ի դաշնակից Թուրքիայի կողմից ձեռնարկված գործողությունները «պատշաճ և համարժեք» են եղել: Նրա համաձայն, նման գործողությունների նպատակը եղել է «Սիրիայի նկատմամբ կանխարգելման էֆեկտն ուղժեղացնելուն»:
Թուրքիայի խորհրդարանը հինգշաբթի օրը հավանության է արժանացրել Սիրիայի դեմ ռազմական գործողությունների շարունակությունը:
Երկրի փոխվարչապետ Բեշիր Աթալայն ասել է, թե մեկ տարի ժամկետով ընդունված իրավական միջոցը պատերազմի հայտարարում չէ, սակայն ընդունվել է՝ Սիրիայի կողմից ագրեսիվ գործողությունները կանխելու նպատակով:
Թուրքիայի պաշտոնյաների համաձայն, երկրի կառավարությունը, ի պատասխան Թուրքիայի տարածքի ուղղությամբ Սիրիայից իրականացված ականանետային հարվածի, գործում է միջազգային կառույցների հետ սերտ համագործակցությամբ:
Աթալայն ասել է, որ Սիրիայի իշխանությունները պաշտոնապես ներողություն են խնդրել և ընդունել պատասխանատվությունը տեղի ունեցածի համար, ինչպես նաև վստահեցրել Միավորված ազգերի կազմակերպությանը, որ «նման միջադեպ այլևս չեն կրկնվի»:
Թուրքիան հինգշաբթի օրն ավելի վաղ կրակ էր բացել Սիրիայի այն տարածքների ուղղությամբ, որտեղից, ըստ զինված ուժերի, բացվել էր զոհերի պատճառը դարձած ականանետային կրակը:
Աքչակալե գյուղի ուղղությամբ Սիրիայի տարածքից չորեքշաբթի օրը բացված ականանետային կրակի հետևանքով զոհվել է խաղաղ հինգ բնակիչ:
Թուրքիայի պաշտոնյաների, ինչպես նաև «Սիրիայում մարդու իրավունքների դիտակետ» կազմակերպության տվյալների համաձայն, Սիրիայի հետ սահմանամերձ տարածքների ուղղությամբ բացված կրակի պատճառով զոհվել են Սիրիայի զինծառայողներ:
Արմեն Հովհաննիսյան
«Ամերիկայի Ձայն»
