Կառավարությունը երեկվա նիստում որոշում ընդունեց օտարել Երևանի Հանրապետության հրապարակի Կառավարության թիվ 2 մասնաշենքը, որտեղ գտնվում է արտաքին գործերի նախարարությունը: Այն վաճառքի ձևով օտարվում է «Տանգո» ընկերությանը՝ մոտ 51 մլն դոլարով: ԱԳՆ-ն տեղափոխվելու է այլ շենք, իսկ նախարարության արդեն օտարված շենքը ծառայելու է որպես հյուրանոց: Պետական գույքի կառավարման վարչությունը պարզաբանել է, որ Կառավարական թիվ 2 մասնաշենքը արտաքին գործերի նախարարության գործունեության համար չի համապատասխանում ժամանակակից պահանջներին…
Իսկ միգուցե կարելի էր լուծո՞ւմ գտնել, որի պարագայում նախարարությունը կաշխատեր համապատասխան պահանջներ բավարարող շենքային պայմաններում, իսկ շենքն էլ չէր օտարվի:
Միգուցե այդ շենքը այլ կարգավիճակում իր ֆունկցիոնալ նշանակությամբ ավելի արդյունավետ ծառայե՞ր հասարակությանը: Սակայն խնդիրն այստեղ վաճառքի բարոյական մասն է: ԱԳՆ շենքը համարվում է պետականության սիմվոլներից մեկը, և նրա նկատմամբ ոտնձգություն կատարելու համար պետք է ունենալ լուրջ հիմնավորումներ: Այստեղ է, որ պետք է հասկանալ վաճառքի իրական մոտիվացիաները:
Վաճառքի հնարավոր մոտիվացիաներից մեկը կարող է լինել պետական միջոցների սղությունը: Եթե այդպես է, ապա պատկերացնել կարելի է, թե ինչ վիճակում է ՀՀ տնտեսությունը, որ ստիպված վաճառում է ԱԳՆ շենքը՝ մի քանի տասնյակ միլիոն դոլարով բյուջեն համալրելու համար: Օրինակ՝ Հունաստանը խոր տնտեսական ճգնաժամի պայմաններում պետական բյուջեն համալրելու համար ստիպված վաճառքի հանեց արտասահմանում գտնվող որոշ դեսպանատների շենքեր և նույնիսկ իրեն պատկանող կղզիներ:
ԱԳՆ շենքի օտարումից ծագող մյուս հարցն այն է, թե արդյոք Հայաստանն այդքան կորցրե՞լ է ներդրումային գրավչությունը, որ հենց երկրի սրտում կարևորագույն պետական հաստատություններից մեկի տեղում պետք է հյուրանոց լինի: Մի՞թե հնարավոր չէ այդ հյուրանոցը 100 մետր այն կողմ կառուցել:
Չի բացառվում, որ մի օր էլ պարզվի, որ կառավարության, Ազգային ժողովի կամ նախագահական նստավայրի շենքերը չեն համապատասխանում ժամանակակից պայմաններին…
Ճարտարապետական այս կառույցները սիմվոլիկ մեծ նշանակություն ունեն, և դրանց օտարումը առանց հանրային բանավեճի նախևառաջ անարգանք է պետական ինստիտուտների նկատմամբ: Վերջին հաշվով՝ ԱԳՆ շենքը չի օտարվում, որպեսզի տեղում թանգարան լինի, օտարվում է, որպեսզի տեղում ժամանցի վայր լինի:
CIVILNET
