Հատկապես մարզերում գյուղացի ֆերմերները աղետներից պաշտպանված չեն, գիտելիքներ չունեն իրենց գործունեության վերաբերյալ, անպաշտպան են նաեւ իրավունքների հարցում: Այսօր, «Կոնգրես» հյուրանոցում, Սոցիալական երկխոսությունը մարզերում եւ մարզերի զարգացում թեմայով կոնֆերանսի ժամանակ Aravot.am-ի հետ զրույցում այսպիսի կարծիք հայտնեց, Գործատուների միության ճյուղային միության նախագահ Վլադիմիր Գալստյանը: Նրա խոսքերով, իրենք տեղեկատվություն եւ խորհրդատվություն են մատուցում այն մարզերում գործող այն տնտեսվարող սուբյեկտներին, որոնք զբաղվում են անասնապահությամբ ու գյուղատնտեսությամբ. «Այսօր գյուղացին շատ մեծ կարիքներ ունի: Տեղեկացված չէ, թե օրինակ` ինչպես պիտի աշխատի, մեր հիմնական նպատակը նրանց տեղեկացնել, շահերը պաշտպանելն է: Ծանոթացնում ենք նոր տեխնոլոգիաներին, գործատուներին օգնում ենք բուժման, աճեցման հարցերով»:
Գործատուների միության նախագահ Գագիկ Մակարյանը մեզ հետ զրույցում փաստեց, որ գյուղական բնակավայրերում գործարարների վիճակը տարբեր պատճառներով տարբերվում է Երեւանի գործարարների վիճակից: Նրա խոսքերով, ստուգող մարմինները մարզերում իրենց «ձեռքերն ավելի ազատ» են թողնում քան` Երեւանում, գյուղական բնակավայրերում գործարար շահերը ներկայացնող կառույցները ոչ լիարժեք են եւ այլն: Ըստ նրա, այսօրվա հավաքի նպատակը մի խնդիր է լուծում. «Բոլոր շահագրգիռ կողմերին մեկտեղել, իրար ճանաչել տալ, օգնել իրար հարգելու, իրար հետ գալու փոխադարձ համաձայնության եւ գործընկերության, որպեսզի մեկը մեկին չարհամարհի, մեկը մեկին չչարաշահի եւ որեւէ մեկն իր իրավունքները չգերակայի: Այն, ինչ երեքով են որոշում, երեքն էլ այդ որոշումը հարգում են, երեքն էլ ուզում են այդ որոշումը կիրառել, բայց, երբ որ մեկն է որոշել այն, երկուսն ասում են՝ դե ոնց ուզում ես գնա արա, տեսնեմ կարո՞ղ ես անել»:
Լուսինե ԲՈՒԴԱՂՅԱՆ
