Վրաստանում կայացած ընտրությունների արդյունքում Ջավախքում եւս հնարավոր է փոփոխություններ լինեն` կապված իշխանությունների` ազգային փոքրամասնությունների նկատմամբ վարվող քաղաքականության հետ. այս կարծիքին է քաղաքագետ Սերգեյ Մինասյանը:
Քաղաքագետի խոսքով՝ «Այժմ Վրաստանում իշխանության եկող ուժերն այլ պատկերացումներ ունեն եւ կարծում են, որ Վրաստանի շահերից ելնելով՝ ավելի լավ իրավիճակ ունենալու համար էֆեկտիվ կլինի իրական ինտեգրումը, որն անպայման չէ, որ տեղի ունենա բռի միջոցներով, կամ որ հայերին ստիպեն վրացերեն սովորել, հայերենը դասացուցակներից հանելով՝ այլ հակառակը, ավելի շատ ներգրավելով տեղի հայ բնակչությանը քաղաքական, տնտեսական եւ հասարակական կյանքի մեջ, ստեղծելով ստիմուլներ, որի արդյունքում տեղի բնակչությունն ավելի մեծ եռանդով կսովորի վրացերեն լեզուն, քան բռի մեթոդներով»:
Մինասյանը համոզմունք հայտնեց, որ իրականում Ջավախքի հարցում հնարավորություն կա ու այն շատ մեծ է, եւ այն նպատակները, սպասումները, Վրաստանի պետականության գաղափարներից ելնելով, որ ունի Վրաստանի քաղաքական էլիտան եւ հասարակությունը, համընկնեցնել մինիմալ սպասումներին, ինչ այսօր ունի ջավախահայությունը:
Եվա ՀԱԿՈԲՅԱՆ
