55-ամյա Սուսաննա Օհանյանն արդեն 17 տարի նուրբ ու կանացի ձեռքերով ամեն օր փայտին կենդանի շունչ է հաղորդում:
Այսօր Վանաձորի Սուրբ Գրիգոր Նարեկացի եկեղեցու դահլիճը լի էր նրա ստեղծած փայտե կերպարանքներից արձակվող կենդանությամբ:
«Սա իմ հինգերորդ անհատական ցուցահանդեսն է, վերջինը երկու տարի առաջ եմ ունեցել, ի տարբերություն նախորդ ցուցահանդեսի` այսօր եղածին ավելացել են 10-ից ավելի աշխատանքներ: «Լռության լեզու» եմ անվանել ցուցահանդեսը` մտածելով, որ այսօր իմ փոխարեն գործերս են խոսելու»,-ասում է կին փայտագործը:
«Հետաքրքրականն այն է, որ այս հրաշալի գործերն ստեղծողը կին է: Ինձ դուր է գալիս նրա մաներան, փայտին տիրապետելու արվեստը, կին լինելով հանդերձ` կարողանում է փայտին շունչ տալ: Թե ձեւի, թե բովանդակության, թե կոմպոզիցիոն առումով բավականին հետաքրքիր լուծումներ ունի»,-իր տպավորություններն է կիսում գեղանկարիչ, պարուսույց Նոբել Էմինյանը:
«Տպավորված եմ, փայտը կարծես խոսում է հետդ, կարծես բան է ուզում ասել, պիտի ականջդ սրես ուշադրությամբ եւ ուղղակի վայելես նրա հոգին»,-ասում է վանաձորցի Անահիտ Համբարյանը:
Ցուցահանդեսը նվիրված է Վանաձորի օրվան :
Անուշ ԲՈՒԼՂԱԴԱՐՅԱՆ
Վանաձոր
