ՀՀԿ պատգամավոր Լեւոն Մարտիրոսյանը սպորտի եւ երիտասարդության հարցերի նախարարից հետաքրքրվեց՝ ես ձեր նախորդ ելույթից հասկացա, որ առաջընթաց է եղել մեր մարզիկների ելույթը՝ լոնդոնյան օլիմպիադայում. «Լոնդոնյան օլիմպիադայի մասին պաշտոնական կարծիքը ո՞րն է: Ինչպե՞ս է շտկվելու իրավիճակը, որպեսզի հաջորդ անգամ մենք նման «առաջընթացներ» չարձանագրենք»:
Նախարար Հրաչյա Ռոստոմյանը պատասխանեց, որ գնահատականը միանշանակ բավարար է. «Կխնդրեմ ավելի զուսպ լինենք մեր մարզիկների նկատմամբ: Խայտառակ ելույթ չի եղել: Հարեւան պետությունների հետ չեմ ուզի համեմատել, որովհետեւ թե՛ ֆինանսավորումը, թե մարզաբազաների առկայությունը անհամեմատելի են»:
Ըստ Լեւոն Մարտիրոսյանի, սա իրեն հիշեցրեց պրոլետարիատի եւ Լենին պապիի հայտնի անեկդոտը, ըստ որի, երբ պրոլետարիատը թաղել է Լենինին, հետո պարզվել է, որ Լենին պապին ոչ միայն չի մահացել, այլեւ կենդանիներից կենդանին է. «Մինչեւ հետ եկան մեր մարզիկները Լոնդոնից, պարզվեց՝ փառավոր հաղթանակ են տարել»:
Կարդացեք նաև
Նախարարը հակադարձեց՝ «Ոչ ոք չի ասել փառավոր հաղթանակ են տարել: Գնահատականը եղել է բավարար»:
Հռիփսիմե ՋԵԲԵՋՅԱՆ
