Քաղաքական պատվե՞ր, թե՞ արդարության վերականգնում. Վարդան Օսկանյանի անվան շուրջ պտտվող մեղադրանքների մասին խոսելիս քաղաքագետ Լեւոն Շիրինյանը այսօր «Երկու երես» ակումբում հետեւյալն ասաց. «Ասենք, թե քաղաքական պատվեր չէ՝ այդքան էլ այդպես չէ: Հայաստանում արդարությունը չի կայանում: Օպոզիցիա կոչվածը կազմակերպված չէ»:
Շիրինյանը խորհուրդ տվեց բոլոր չինովնիկներին՝ ազատազրկման վայրերը կարգի բերել, որովհետեւ, ըստ նրա, իրենք դեռ այնտեղ երկար են նստելու. «Հայաստանի վերնախավը պետք է պատրաստ լինի իր վերահսկած բանտերում նստելու եւ իր սարքած հիվանդանոցներում բուժվելու»: Պատասխանելով Aravot.am-ի հարցին, թե Օսկանյանի գործում կա՞ արդյոք Քոչարյանի գործոնը, քաղաքագետն ասաց. «Կարող է կա, կարող է չկա, բայց այն, որ Քոչարյանը ռեժիմի սյուներից մեկն է, դա հաստատ է»:
Անդրադառնալով Օսկանյանի դիրքերի թուլացմանը ու այն միտումներին, թե հնարավոր է դա շոու է կամ ներքին համագործակցություն, Շիրինյանն ասաց. «Չենք հավատում, բայց Հայաստանի բիզնես աշխարհը ճաքել է»: Քաղաքագետի համոզմամբ՝ Օսկանյանի դեպքը նաեւ զգուշացում է ԲՀԿ առաջնորդ Գագիկ Ծառուկյանին, քանի որ չի բացառվում, որ հաջորդը կարող է հենց նա լինել:
Կարդացեք նաև
Խոսելով նախագահական ընտրություններից եւ Քոչարյանի առաջադրվելու մասին, քաղաքագետն ասաց. «Ես ուզում եմ, որ նա առաջադրվի: Ավելի ճիշտ՝ նա պարտավոր է առաջադրվել: Հայաստանում մի տեսակ ավանդույթ է դարձել պաշտոնից նեղացած տուն գնալը, ինչը սխալ է»:
Եվա ՀԱԿՈԲՅԱՆ
