Օրերս Շիրակի մարզի ընդհանուր իրավասության դատարանը պայմանականորեն ազատ արձակեց Գյումրու «Մհեր Մկրտչյան հուշատուն թանգարանի» 41-ամյա տնօրեն, ՀՀԿ-ական Շողիկ Մելքոնյանին, որի դեմ հարուցվել էր քրեական գործ` ԱԺ ընտրությունների օրը Շառլ Ազնավուրի հրապարակում 5000-ական դրամ ընտրակաշառք բաժանելու մեղադրանքով: Դատախազությունը հիմք էր ընդունել ԳԱԼԱ հեռուստաընկերության «Էս ինչ հաշիվ ա՜…» վերնագրով տեսանյութը, որտեղ պարզ երևում էր առուծախի այդ տեսարանը:
Այսօր Aravot.am-ը Գյումրու ԳԱԼԱ հեռուստաընկերության սեփականատեր Վահան Խաչատրյանին հարցրեց` ինչպե՞ս է գնահատում դատարանի` Շողիկ Մելքոնյանին ազատ արձակելու որոշումը: «Ես ճիշտն ասած չեմ ճանաչում տնօրենին, չգիտեի անգամ նա կին էր, թե՞ տղամարդ, բայց շատ ուրախ եմ, որ ազատ են արձակել այդ մարդուն, որովհետև այստեղ կատարվում է խաղ. իշխանությունները առաջին հերթին պետք է բռնեին ոչ թե կատարողին, ռուսերեն ասած` стрелочник-ին, այլ` կազմակերպողին: Այն, որ գործ հարուցվեց, հետո մի պահ էդ գործը քնեցրեցին, հետ նորից վերակենդանացրեցին` ելնելով այս կամ այն քաղաքական իրավիճակից, սա խոսում է այն մասին, որ ամբողջ իրավապահ համակարգը ծառայում է մեկ նպատակի` երբ որ պետք է` գործ են հարուցում, երբ որ պետք է` քնեցնում են: Եվ դրա համար ընտրակաշառք բաժանողին ես չեմ մեղադրում, այլ մեղադրում եմ այն մարդկանց, ովքեր դրդել են: Եթե այս պարագայում կաշառքը բաժանվել է ՀՀԿ-ի օգտին, ապա ես մեղադրում եմ ՀՀԿ-ի վերնախավին, առաջին հերթին ՀՀԿ-ի առաջին դեմքին` նախագահ Սերժ Սարգսյանին, և հետո մնացած բոլորին, ովքեր ամենավերևից ուղիղ հրահանգը տվել են»:
ԳԱԼԱ-ի սեփականատերը հրահանգ կատարողներին խորհուրդ է տալիս չհավատալ վերևների այն հավաստիացումներին, թե իրենք անձեռնխելի են: «Ցանկացած պահի ցանկացած մեկին ռեժիմը կարող է հանձնել: Եթե ռեժիմին պետք լինի, որ էս պահին այս կամ այն մարդուն պետք է հանձնեն, ապա նրանք կհանձնեն առանց մտածելու, ինչպես եղավ Ղուկասյան Վարդան հետ: Ես ուզում եմ շեշտել, որ այդ գործն ընդհանրապես կապ չուներ այն բանի հետ, որ ռեժիմը ուզում է ձերբազատվել կամ արմատախիլ անել ընտրակաշառք կոչվող վատ երևույթը: Ընտրակաշառքի փաստի առիթով գործ հարուցելը ուղղակիորեն կապված էր Վարդան Ղուկասյանին մեսիջներ ուղարկելու հետ: Ղուկասյան Վարդանին նախազգուշացրեցին` եթե դու առաջադրվես , մենք ընտրակաշառք բաժանելու գործի ուղղությունը կբերենք քո կողմ: Դրանից հետո գործը քնեցվեց, նորից վերականդանցվեց ճիշտ այն ժամանակ, երբ Վարդան Ղուկասյանը փորձեց ինքնուրույն խաղ խաղալ կամ փորձեց իմիտացիա անել, որ ինքը ինքնուրույն դեմք է, և կփորձի ընդդիմանալ Սերժ Սարգսյանին: Միայն այդ ժամանակ այս քրեական գործը նորից վերկանդանացրեցին: Եվ այս միամիտ մարդը, որին բռնել կամ գործ էին հարուցել , ընդամենը մարդ էր, որը անիմաստ տեղը պիտի գնար գաղութ: Մեղք են շարքային գործիչները, որոնց կեղտոտ խաղի մեջ են ներքաշում: Ամենասարսափելին այն է , որ ռեժիմը ներքաշում է սովորական մարդկանց, ինտելիգենտ մարդկանց, ինչքան հասկացա այս կինը ինտելիգենցիայի ներկայացուցիչ է, որին մտցնելով խաղերի մեջ, դարձնում են հանցագործ: Նորից եմ կրկնում` շատ ուրախ եմ, որ ազատ են արձակել նրան, քանի որ գործը պիտի հարուցվեր ամենաբարձր ղեկավարության վրա»:
Մեր այն դիտարկմանը, որ տիկնոջը պայմականորեն են ազատ արձակել, նրան 3 տարվա ազատազրկման դատապարտելով` միաժամանակ հսկողության տակ են վերցրել վարքը, Վահան Խաչատրյանն այսպես արձագանքեց. « Սկսած առաջին դեմքից` ամենաբարձր պաշտոնյաների վարքը պետք է հսկողության տակ վերցվի, ինչը ցավոք չի արվում, որովհետև ստեղծվել է մոնոպոլ կառույց, և հակակշիռներ չկան, մինչդեռ շատ ցանկալի կլիներ հսկել բոլորի վարքը»,- ասում է ԳԱԼԱ-ի սեփականատերը:
Կարդացեք նաև
Նունե ԱՐԵՎՇԱՏՅԱՆ
