Կարդացեք նաև
Այսօր Կենտրոն եւ Նորք-Մարաշ վարչական շրջանների ընդհանուր իրավասության դատարան էին ներկայացել Վահրամ Մարգարյանի (Գուրգեն Մարգարյանի եղբոր) եւ Բորիս Հակոբյանի դեմ հարուցված քրեական գործով ընթերակա, ձգաբան եւ դատաբժիշկ: Շավարշ Գեւորգյանը մասնակցել էր անցյալ տարվա օգոստոսի 2-ին Երեւանի Զաքյան փողոցում սպանված, տուժող Խաչիկ Գալոյանի դիակի դատաբժշկական փորձաքննությանը: Նրա տված թիվ 725 եզրակացության համաձայն, եղել էր 7 հրազենային վնասվածք, մինչդեռ նախորդ դատական նիստին ամբաստանյալ Բորիս Հակոբյանը պնդեց, որ ինքն է սպանել Խաչիկ Գալոյանին՝ 5 անգամ կրակելով նրա վրա:
Փորձագետը այս հակասությունը փորձեց բացատրել նրանով, որ չունի տեղեկություններ, թե ինչ դիրքում է գտնվել հանգուցյալը եւ դիրքը հայտնի լինելու դեպքում կարող էր դատողություններ անել:
Հաջորդ փորձագետը դատաձգաբան Վարդան Ռոստոմյանն էր՝ իրեղեն ապացույց ճանաչված F-1 նռնակի եւ G-1 պայթուցիչի հետ կապված: Հարցն այսպիսին էր՝ կարո՞ղ էին դրանք համատեղ օգտագործվել: Փորձագետը հաստատեց, որ դրանք ինքնաշեն են, եւ կարող են համատեղ օգտագործվել, թեեւ երկու տարբեր միավորներ են: Այսօր փորձագետը հրավիրվել էր դատարան, որպեսզի մասնակցեր պայթուցիչի եւ նռնակի՝ իրեղեն ապացույցի զննությանը: Սակայն զննելու խնդիր այլեւս չառաջացավ, փորձագետը հեռացավ՝ պայթուցիչն ու նռնակն իր հետ տանելով:
Դատարանում բավական հակասական ցուցմունք տվեց ընթերական՝ Նելլի Մուրադյանը: Նա «մասնակցել» էր խուզարկությանը եւ ստորագրել օգոստոսի 17-ի արձանագրության տակ: Չնայած Բորիս Հակոբյանի պաշտպան Կրոմվել Գրիգորյանը ցույց տվեց խուզարկության իր ձեռքի տակ եղած արձանագրությունը, որը թվագրված էր անցյալ տարվա օգոստոսի 19-ին: Այս վկան հայտնեց դատարանում, որ ծնողների տանն էր՝ Լենինգրադյան փողոցում գտնվող, եղել է վատառողջ եւ ոստիկաններ են ներկայացել իրենց, հրավիրելով խուզարկության: Երբ ընթերական գնացել է նույն շենքում գտնվող Լիա Մարգարյանի (վերջինի եղբոր տղան է Վահրամը) բնակարան, այդ ընթացքում եղել է «զալում» նստած, քանի որ վատառողջ էր, «սիստեմայի տակ», եւ միայն խուզարկությունն ավարտվելուց հետո ստորագրել է թղթի տակ:
Դատախազ Արմեն Աֆանդյանը միջնորդեց, որպեսզի հրապարակվի նրա նախաքննական ցուցմունքը եւ խուզարկության արձանագրությունը: Պարզվեց՝ այս վկան «տեսել էր» խոհանոցում Վահրամի բջջային հեռախոսը, պայթուցիչ, անգամ գտնվել էր «Վահեի սենյակում»: Վկան, Կրոմվել Գրիգորյանի հարցաքննությանը չդիմանալով, խոստովանեց, որ իրեն ոստիկանության քննիչն է թելադրել եւ որ հարցաքննությանն էլ մասնակցել է մի երկու շաբաթ հետո: Այս վկան խուզարկության արձանագրության տակ գրել էր. «խուզարկությունն անցավ օրենքի սահմաններում»:
Կրոմվել Գրիգորյանին հետաքրքրեց, թե ի՞նչ մասնագիտություն ունի վկան, պարզվեց՝ մանկաբարձ է, իսկ «իրավաբանական» ձեւակերպումն էլ պատկանում էր ոստիկանության Կենտրոնական բաժնի օպեր-լիազոր, խուզարկությունն իրականացրած կապիտան Մեսրոպյանին: Վկան նաեւ նկարագրեց իր վիճակի ծանրությունը, ասելով, որ այնքան վատ էր, որ անընդհատ ջուր է խմել:
Այսօր դատարանում վկան վատ էր զգում, սակայն բարձրաձայնել չուզեց հիվանդության պատճառը: Միջնորդությամբ հանդես եկավ պաշտպանական կողմը՝ պաշտպան Վահագն Բաբայանը, որը միջնորդեց, որպեսզի անթույլատրելի ճանաչվի խուզարկության հետ կապված արձանագրությունը:
Դատախազը միջնորդեց, որպեսզի դատարան հրավիրվի օպեր-լիազոր Մեսրոպյանը: Պաշտպանական կողմը դեմ էր , անգամ հղում արեց հետագայում ապացույցը «լրացնելուն»: Սակայն դատավոր Արշակ Վարդանյանը բավարարեց միջնորդությունը:
Վկա Աշոտ Ֆրանգուլյանին բնակարանում չէին հայտնաբերել, հետեւաբար՝ նա նորից կծանուցվի: Դատախազը հայտնեց, թե իր տեղեկություններով՝ այս վկան ստացիոնար բուժման մեջ է գտնվում:
Դատական հաջորդ նիստը նշանակվեց հոկտեմբերի 9-ին:
Ռուզան ՄԻՆԱՍՅԱՆ
