Ըստ «Նոր ժամանակներ» կուսակցության ղեկավար Արամ Կարապետյանի, իրավական տեսակետից նախկին արտգործնախարար Վարդան Օսկանյանի գործով քաղաքական պատվերը վատ է իրագործված: «Ես կասեի, չստացված: Պետք է հասկանալ, ինչու են այդ քաղաքական պատվերը տվել»,- այսօր ասուլիսում ասաց պարոն Կարապետյանը՝ առաջ քաշելով պատվերի 3 սցենար. «Սցենար 1-ին. Վարդան Օսկանյանին դարձնում են թեկնածու: Իշխանությունը՝ Սերժ Սարգսյանը, արհեստական թեկնածու է ուզում ներկայացնել: Եթե պարզվի, որ սա խաղ է , Օսկանյանն ու Ծառուկյանն ավելի վատ վիճակում կհայտնվեն, քան ժամանակին Արթուր Բաղդասարյանը:
Սցենար 2. ԲՀԿ-ն սկսել է ընդդիմադիր կեցվածք դրսեւորել, եւ այդ ընդդիմադիր կեցվածքը կարող է վերջանալ նրանով, որ սեփական թեկնածուով հանդես գա, դրա համար սկսել են այսպիսի գործընթացներ:
3-րդ սցենարը կապվում է արտաքին գործոնով: ԲՀԿ-ն միշտ դրսեւորում է ավելի շատ գեոքաղաքական դաշտի հետ լավ հարաբերություններ ստեղծելու ուժ: Բայց փաստացիորեն ԲՀԿ-ի համար 2-ը մեղադրվում է Հանթսմանի փողերը ստանալու, սկզբից լվանալու, հետո յուրացնելու մեջ: Այս ամենի մեջ , կարեւոր կետը, որ հնչեցվում է՝ ամերիկացի, հանրապետական կուսակցության ներկայացուցիչ Հանթսմանի փողերն են: Այսինքն, ինչպես կարող է մի ուժ՝ «Բարգավաճը» հավակնել եվրասիական միության, Ռուսաստանի հետ ջերմ հարաբերություններին եւ ավելի՝ ինտեգրացման կողմնակից լինել, եթե իր 2-րդ համարի ներկայացուցչի հիմնադրամը ամերիկացի Հանթսմանի կողմից է ֆինանսավորվում»:
Պարոն Կարապետյանը խորհուրդ տվեց ՀՀ նախագահ Սերժ Սարգսյանին Օսկանյանի գործով 2 հանգամանք հաշվի առնել. «Նման սցենարները ծանր կացության մեջ են դնում երկիրը , որովհետեւ երկրի վարկը դուրս է գալիս ամեն արտգործնախարարի՝ դաշտից դուրս գալու հետ: Ստացվում է՝ հենց դաշտից դուրս են գալիս, սկսում են փող լվանալ: Հայաստանում իրավապահ կառույցները սրանով սկսում են խիստ վարկաբեկվել, որովհետեւ, եթե սրանք են հիմքերը, ինչ ներկայացվեց, ուրեմն այս գործն ապագա չունի, ինչպես Ալեքսանդր Արզումանյանինը: 10 տարվա արտաքին գործերի նախարարին մեղադրել՝ 181.000 դոլար է ծախսել ռեստորանում թե հյուրանոցում, իսկապես վարկաբեկիչ բան է: Եթե այս ամենը գալու էր հանգել սրան, կարելի էր ներքին կարգով լուծումներ տալ եւ չդարձնել աշխարհի քննարկման թեմա»:
Կարդացեք նաև
Արփինե ՍԻՄՈՆՅԱՆ
