ԲՀԿ մամուլի խոսնակ Տիգրան Ուրիխանյանը հակադարձում է երեկ խորհրդարանում հնչած մեղադրանքներին
– Խմբակցության քարտուղար Նաիրա Զոհրաբյանն իր ելույթում հայտարարեց, որ գլխավոր դատախազի միջնորդությունը՝ Վարդան Օսկանյանին որպես մեղադրյալ քրեական գործում ներգրավելու մասին, «քաղաքական պատվեր է ԲՀԿ-ի դեմ», եւ որ ԲՀԿ խմբակցության պատգամավորները չեն մասնակցելու քառօրյայի հետագա նիստերին: Իսկ հետագա նիստերին մասնակցության հարցը կորոշվի: Կարծում եք՝ դա հարցի լուծման լավագո՞ւյն ձեւն է: Միեւնույն է՝ ՀՀԿ-ն մեծամասնություն է եւ կարող է ինքնուրույն որոշումներ կայացնել:
– Խորհրդարանի գործունեությանը ծանոթ մարդկանց համար ակնհայտ է, որ արդյունավետ եւ լավագույն տարբերակը հիմա նիստին չմասնակցելն է, ինչն էլ անելու ենք մենք: Եվ նույնը ակնկալում ենք նաեւ անկեղծորեն այս հարցի արդարացի լուծման մեջ շահագրգռված խմբակցությունների կամ անհատ պատգամավորների կողմից:
Կարդացեք նաև
– Իսկ տիկին Զոհրաբյանի այդ կոչին արձագանքներ եղա՞ն: Թեկուզ մասնավոր զրույցներում անհատ պատգամավորներ կամ խմբակցություններ ցանկություն հայտնե՞լ են բոյկոտին միանալու:
– Անկեղծ ասած՝ լարված, ծանրաբեռնված աշխատանքային ժամերը թույլ չտվեցին անձնական զրույցներ վարել, բայց քվեարկության արդյունքներն արդեն ցույց կտան, թե ով ինչ դիրքորոշում ունի: Արդեն այսօր կլինի քվեարկությունը, մասնակցողներն էլ կերեւան, չմասնակցողներն էլ:
– Գլխավոր դատախազի միջնորդության բավարարման պարագայում ի՞նչ քայլեր են նախատեսված ԲՀԿ-ի կողմից:
– Մենք հուսով ենք, որ ողջամտությունը կհաղթի, մենք հուսով ենք, որ արդարությունը կհաղթի, եւ մենք ապավինում ենք դրան: Առայժմ:
– Խմբակցության մեկ այլ պատգամավոր՝ Վահե Հովհաննիսյանն իր ելույթում հայտարարեց, որ Օսկանյանի դեմ վճիռն, ըստ էության, կայացվեց մայիսի 6-ին հրապարակված խորհրդարանական ընտրությունների արդյունքներով: Ի՞նչ նկատի ուներ պարոն Հովհաննիսյանը: ԲՀԿ-ում դեռ այն ժամանակ տեղյա՞կ էին այս ամենին, եւ ի՞նչ կապ ուներ դա ընտրությունների հետ:
– Ոչ: Վահե Հովհաննիսյանի այդ խոսքերը նշանակում են, որ դա ակնհայտորեն կապված է պարոն Օսկանյանի քաղաքական գործունեության հետ:
– ՀՀԿ-ական պատգամավոր Արտաշես Գեղամյանին զարմացրել է ԲՀԿ-ի պահվածքը, մասնավորաբար այն, որ կուսակցությունը պատրաստվում է փաստաթղթեր ներկայացնել գործընկերների դատին, որոնք կապացուցեն միջնորդության սին լինելը: «Օսկանյանը հրաժարվել է ցուցմունք տալ նախաքննության մարմնին, իսկ հիմա ցուցմունքների գործի մեջ է ներքաշում մի ամբողջ կուսակցության»,- ասել Գեղամյանը: Ի՞նչ կհակադարձեք:
– Պարոն Գեղամյանը ժամանակին պաստառներ էր տարածել Հայաստանով մեկ՝ «Փրկենք հայրենիքը» կոչով: Ու ավելին, քան հանրությունը գիտի Գեղամյանի մասին, ասել չեմ կարող:
– ՀՀԿ-ական պատգամավորներն իրենց ելույթներում փորձում էին արդարացնել դատախազի միջնորդությունը՝ բարոյախրատական տոնայնությամբ: Որքանո՞վ է ընդունելի դա:
– Նախ՝ միջնորդությունն անհիմն է: Ապա՝ որեւէ մեկն էլ պարտավոր չէ ապացուցել իր անմեղությունը: Մեղադրող կողմը պարտավոր է ապացուցել եւ հիմնավորել իր կողմից առաջ քաշված ցանկացած վարկած:
– Բավականին կոշտ եւ մեղադրական խոսեց նաեւ ՀԱԿ խմբակցության պատգամավոր Նիկոլ Փաշինյանը՝ 2008 թվականի մարտիմեկյան իրադարձությունների ժամանակ թափված արյան ուղղակի պատասխանատուներից համարելով Վարդան Օսկանյանին:
– Հռետորաբանությունն ու կոնկրետ քրեական գործի շրջանակներում բերված փաստարկներն ու դիտարկումներն ընդհանուր բան չունեն:
– Այս ընթացքում բազմիցս եւ տարբեր առիթներով խոսվել է մարտիմեկյան իրադարձություններում Վարդան Օսկանյանի քաղաքական պատասխանատվության մասին: Կուսակցությունում այդ թեմայով քննարկումներ եղե՞լ են: Չե՞ք գտնում, որ պարոն Օսկանյանն իսկապես այդ ամենի համար քաղաքական պատասխանատվություն է կրում, չե՞ք պատրաստվում ձեր կուսակցին այդ մասով պատասխանատվության դաշտ բերել:
– Պատասխանատվություն այս պարագայում նշանակում է կոնկրետ իրավական գործողություններ: Իրավական գործողությունները քաղաքական հռետորաբանության հետ կապ չունեն:
– Այս ընթացքում նաեւ տեսակետներ հնչեցին, որ Օսկանյանի հետ կապված այս պատմությամբ իշխանությունները փորձում են ԲՀԿ-ի եւ Օսկանյանի համար ընդդիմադիրի կերպար կերտել: Կա՞ դրանում ճշմարտության հատիկ:
– Օսկանյանն իր կերպարը կերտել է երկար տարիների գործունեության ընթացքում, եւ հատկապես վերջին շրջանի իր հրապարակային եւ թափանցիկ ելույթները, կարծում եմ, լիարժեք պատասխաններ տալիս են իր կերպարի հետ կապված:
ՆԵԼԼԻ ԳՐԻԳՈՐՅԱՆ
«Առավոտ» օրաթերթ
