Այսօր լրագրողների հետ զրույցում ԿԳ նախարար, ՀՀԿ փոխնախագահ Արմեն Աշոտյանն անդրադարձավ Վարդան Օսկանյանի հետ կապված վերջին իրադարձություններին եւ ասաց, որ երեկ հետեւել է ԱԺ քննարկումներին. «Կարծում եմ, որ գլխավոր դատախազը եւ նրա ընդդիմախոսները խոսում էին տարբեր լեզուներով: Դատախազը խոսում էր իրավական լեզվով, իսկ ընդդիմախոսները՝ քաղաքական: Պատահական չէ եւ ոչ էլ զարմանալի, որ նրանք իրար չէին հասկանում»:
Աշոտյանի խոսքով. «Որոշ մարդկանց ելույթներից տպավորություն ստեղծվեց, որ «սրբերի դասում» առաջացել են թափուր տեղեր: Ինչ վերաբերում է հարցի քաղաքականացմանը, եթե կա նման ենթատեքստ, ապա այն պետք է առկա լինի հենց ԲՀԿ-ի ներսում: Գաղտնիք չէ, որ այդ խմբակցության ներսում ընթանում է ազդեցության պայքար՝ տարբեր մարդկանց եւ խմբերի միջեւ, եւ կարծում եմ, որ Օսկանյանի թուլացումը քաղաքական տեսակետից կարող է ձեռնտու լինել հենց նրա որոշ կուսակիցների համար»:
Լուիզա ՍՈՒՔԻԱՍՅԱՆ
