Հատված ԱԺ արտաքին հարաբերությունների հանձնաժողովի նախագահ Արտակ Զաքարյանի հարցազրույցից:
– Ճի՞շտ եք համարում Վարդան Օսկանյանին պատգամավորական անձեռնմխելիությունից զրկելը, մանավանդ որ և՛ ինքը, և՛ ԲՀԿ-ն դա համարում են քաղաքական գործունեության հետևանք։
– Բազմիցս ասվել է, որ դա քաղաքականության հետ կապ չունի։ Քաղաքական շատ ավելի ծայրահեղ դիրքորոշումներով քաղաքական գործիչներ կան, և ի՞նչ։ Այս գործընթացն ուղղված չէ որևէ անձի կամ խմբավորման դեմ։ Մենք ուղղակի չպետք է արգելափակենք իրավական գործընթացն առաջ տանելու հնարավորությունը։
Կարդացեք նաև
– Այսինքն, այս հարցը ՀՀԿ-ԲՀԿ փոխհարաբերություններում չէ՞։
– Դա ընդհանրապես չի կարելի քաղաքական կյանքին առնչվող խնդիր դիտել, գործող անձինք կարող են լինել քաղաքական գործիչներ, կարող են չլինել, իրավական գործընթացներ կան, որ պետք է կատարվեն։
– Ինչպիսի՞ն են հիմա ՀՀԿ–ԲՀԿ փոխհարաբերությունները։
– Աշխատանքային։ Լինում են և համագործակցություններ ու հակադրություններ, և՛ համաձայնություններ ու տարակարծություններ։
– Ինչքա՞ն է տևելու այլընտրանքային վիճակը ԲՀԿ–ում՝ Ձեր կարծիքով։
– Բնականաբար, ԲՀԿ-ի որոշելիքն է, թե քաղաքական ինչ դերակատարություն կստանձնեն և ինչ միջավայր կընտրեն։ Քաղաքական գործընթացները յուրաքանչյուր կուսակցության համար որոշակի վարքաբանություն են թելադրում, ու եթե ԲՀԿ-ն որոշել է ո՛չ իշխանություն, ոչ ընդդիմություն լինել, գուցե դա ևս քաղաքականությանը մասնակցելու ձևաչափ է։
Անահիտ ԱԴԱՄՅԱՆ
«Իրատես de facto»
