Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Արշակ Վարդանյանն այսօր շարունակեց Գերագույն Խորհրդի նախկին պատգամավոր, «Ղարաբաղ» կոմիտեի անդամ Սամսոն Ղազարյանի դեմ հարուցված քրեական գործի դատաքննությունը:
Սամսոն Ղազարյանն այսօր էլ միայնակ էր, քանի որ պաշտպանը ըստ նախագահողի, դիմել էր դատարան, հայտնելով, որ հրաժարվել է Սամսոնի պաշտպանությունը իրականացնել:
Պատճառաբանության հիմքում երկու փաստարկ էր նշել. ծանրաբեռվածությունը մեկ այլ քրեական գործով, եւ՝ Սամսոն Ղազարյանի հետ պայմանագիր չունենալը:
Կարդացեք նաև
Երկրորդ անգամ դատարան էր ներկայացել Պաշտպանության նախարարության աշխատակից Ավագ Հարությունյանը: Սամսոն Ղազարյանն սկզբում առարկեց, որ առանց պաշտպանի լսեն վկային, ապա համաձայնեց:
Վկան ասաց, որ պատմաբան Համլետ Գեւորգյանն իրեն ասել է, որ Սամսոն Ղազարյանը տոկոսով գումար է տվել տուժող Մեխակ Գաբրիելյանին: Երբ Մեխակը գնացել է, որպեսզի Սամսոնի գումարը մարի, նա պահանջել է այլ գումար: Վկան Սամսոն Ղազարյանին տեսնում էր դատարանում, չի ճանաչել, իսկ նրա մասին հեռակա գիտեր ղարաբաղյան շարժման ժամանակ:Վկան նախկին Գերագույն Խորհրդի մեկ այլ պատգամավոր Մեխակ Գաբրիելյանին էլ առաջին անգամ տեսել է երկու ամիս առաջ՝ Համլետ Գեւորգյանի մոր հուղարկավորության ժամանակ:
Սամսոն Ղազարյանի հարցին, թե արդյոք վկան հավատո՞ւմ է Համլետ Գեւորգյանի պատմածներին, պատասխանեց, որ շահ չունի չհավատալու, քանի որ տոկոսով գումար չի տվել Մեխակին եւ որեւէ առնչւթյուն չուներ երկուսի հետ: Այն հարցին, թե տոկոսի չափը որքա՞ն էր, վկան պատասխանեց, որ չի իմանում «տոկոսի չափսը»:
Սամսոն Ղազարյանի հաջորդ հարցին, թե գուցե Համլետը շա՞հ ուներ, վկան պատասխանեց՝ դոկտոր-պրոֆեսոր մարդ է, ինչ շահ կարող էր ունենալ: Սամսոն Ղազարյանն ասաց՝ «կոչման, գրքերի…»: Այստեղ չդիմացավ Մեխակ Գաբրիելյանի ներկայացուցիչը՝ Հրանտ Գեւորգյանը, որը հայտարարեց, թե պատմաբան Համլետ Գեւորգյանի հեղինակած գրքերը լույս են տեսել բացառապես արտերկրում գտնվող նրա ընկերների աջակցությամբ, որի հետ Մեխակ Գաբրիլյանը կապ չունի:
Այսօր բերման ենթարկելով դատարան պիտի ներկայանար Շանթ Հարությունյանը, սակայն դատարանը նրա մասին չհիշեց էլ:
Հաջորդ դատական նիստը նշանակվեց հոկտեմբերի 12-ին: Սամսոն Ղազարյանը խոստացավ դատարան ներկայանալ նոր պաշտպանով:
Ռուզան ՄԻՆԱՍՅԱՆ
