ԵԽԽՎ-ում հայկական պատվիրակության անդամ, ՀԱԿ անդամ Լևոն Զուրաբյանը Եվրոպայի խորհրդի նախարարների կոմիտեին գրավոր հարց է ուղղել Մարտի 1-ի վերաբերյալ:
Լ. Զուրաբյանը գրել է, որ 2008-ին ՀՀ իշխանությունները ուժ են գործադրել խաղաղ ցուցարարների նկատմամբ, որոնք բողոքում էին՝ ընդդեմ կեղծված ընտրությունների: Հարձակման պատճառով զոհվեց 10 մարդ, մյուսները վիրավորվեցին: Պարոն Զուրաբյանը հղում է կատարել ԵԽԽՎ 1609 (2008թ.) բանաձեւին, որով նախատեսված է մարտի 1-ի դեպքերի անկախ, թափանցիկ, վստահելի քնննություն:
Այնուհետև Լ.Զուրաբյանը վկայակոչել է նաև 1837 բանաձեւը, որով ԵԽԽՎ-ն իր մտահգությունն էր հայտնում մարտի 1-ին զոհված 10 անձի գործի քննության արդյունքների սղության առումով: Լ. Զուրաբյանը նաև նշել է, որ ՀՀ իշխանությունները անուշադրության են մատնել կոչերը, որոնք սահմանված են 1837 բանաձեւով և հասարակությանը չեն ներկայացրել որևէ արժանահավատ զեկույց այն մասին, թե ինչու իրենք չեն հաջողել ներկայացնել այն անձին, ով պատասխանատու է մարտի 1-ի տասը զոհերի համար:
Լ. Զուրաբյանը նկատել է, թե այսքանից հետո այժմ ակնհայտ է, որ ՀՀ իշխանությունները ներգրավված են սպանությունների մեջ, քանի որ ցանկացած վստահելի հետաքննություն կարող էր բացահայտել նրանց ուղղակի պատասխանատվությունը նշված ողբերգության հետ:
Կարդացեք նաև
ԵԽԽՎ-ում Հայաստանի պատվիրակության անդամը հետաքրքրվել է, թե Նախարարների խորհուրդն ի՞նչ քայլեր է ձեռնարկելու՝ ստիպելու համար ՀՀ իշխանություններին ստանձնել մարտի 1-ի ողբերգության պատասխանատվությունը:
Նախարարների խորհրդի կողմից տրվել է հետևյալ պատասխանը. «ՀՀ-ի պարտավորությունների մոնիտորինգի ժամանակ ՀՀ իշխանությունների կողմից Մարտի 1-ի հարցը բարձրացվեց 2008-ի ապրիլի և 2009-ի նոյեմբերի այցերի ժամանակ: Այս հանդիպումների ժամանակ ընդգծվել է ջանասիրությունն ու կամքը իրականացնել ամբողջական և թափանցիկ հետաքննություն մարտի 1-ի 10 զոհերի սպանության հանգամանքները բացահայտելու համար: Նշվել է, որ դա կօգնի ամոքել վերքերը և ստեղծել վստահության վրա հիմնված քաղաքական մթնոլորտ: Եվ հաշվի առնելով առաջիկա նախագահական ընտրությունները՝ նշվածի ապահովումը մեծ կարևորություն ունի»:
Տաթև ՀԱՐՈՒԹՅՈՒՆՅԱՆ
