«Գրված է, որ գումարը թող լինի իր հայեցողությամբ, բայց Հանթսմանները չեն նշում, որ դա պետք է գնա Վարդան Օսկանյանի գրպանը: Իր հայեցողությամբ ասելով՝ չի նշանակում, որ Վարդան Օսկանյանը կարող է այն ծախսել անձնական կարիքների համար»,- այսօր ԱԺ-ում ԲՀԿ պատգամավոր Վարդան Օսկանյանին անձեռնմխելիությունից զրկելու հարցի քննարկմանը ասաց գլխավոր դատախազ Աղվան Հովսեփյանը:
Նա վստահեցրեց, որ կան տեղեկություններ, ապացույցներ, որոնք այս պահին իրավունք չունի հրապարակել, քանի որ բանկային գաղտնիք է. «Երբ կմտնենք դատարան, կստանանք դատարանի համաձայնությունը, որոշումը, կարող ենք հրապարակային ներկայացնել բանկային գաղտնիքը: Ես որպես ՀՀ գլխավոր դատախազ կապահովեմ այդ գործի հրապարակայնությունը»:
Հարցին՝ հնարավո՞ր է, որ Վարդան Օսկանյանը կալանավորվի՝ պարոն Հովսեփյանը պատասխանեց. «Առանց ձեր համաձայնության Վարդան Օսկանյանը կալանավորվել չի կարող: Նրա կարգավիճակի վրա, բացի դատավարական կարգավիճակը, այլ փոփոխություններ չեն կատարվելու: Նա որպես պատգամավոր որեւէ սահմանափակումներ չի ունենալու, չի ունենալու նաեւ տեղաշարժման որեւէ սահմանափակումներ»:
Կարդացեք նաև
Վահան Հովհաննիսյանը հարց տվեց. «Խոսվեց փողի լվացման մասին, նախ պետք է փողը կեղտոտ լինի՝ այն լվալու համար: Նախադեպ նման գործի կա՞ մեր դատարաններում: Նման մեղադրանքով որեւէ մեկը երբեւեէ ներգրավվե՞լ է գործի մեջ, կա՞ դատավճիռ: Երկրորդ՝ ինչո՞ւ չեք հրավիրում, օրինակ, Հանթսմանների ընտանիքը հարցաքննության, որովհետեւ իրենց անունները բավականին հաճախ կրկնվում են ձեր զեկուցման մեջ: «Սիվիլիթաս» ֆոնդն ունի իր կանոնադրությունը: Այդ կանոնադրության մեջ կա՞ կետ, որին հակասում է այս վարկածը՝ Վարդան Օսկանյանը կարո՞ղ էր ինքը լինել շահառու, թե՞ ոչ: Ես չեմ տեսնում կանոնադրության մեջ այդ կետը: Մեր օրենքն ի՞նչ է ասում, վկան իրավունք չունի հրաժարվելու ցուցմունք տալուց, բայց մեղադրյալն ունի: Ի՞նչ է փոխվում Վարդան Օսկանյանի կարգավիճակի փոփոխությունից: Եթե նորից հրաժարվի ցուցմունք տալ, ի՞նչ է լինելու»: Աղվան Հովսեփյանը պատասխանեց, որ ոչինչ չի լինելու. «Վարդան Օսկանյանը, որպես մեղադրյալ օգտվելու է դատավարական իր իրավունքներից: Նա իրավունք կունենա ունենալու պաշտպան, ցուցմունք տալ»:
Հանթսմանների ընտանիքը կանչելու հետ կապված գլխավոր դատախազն ասաց, որ «չեմ կարծում, որ նախաքննության մարմինը Հանթսմանների ընտանիքը Հայաստան հրավիրելու կարիք ունի: Հանթսմաններին՝ Հայաստան հրավիրելու, թեկուզ դատավարության համար, այս պահին անհրաժեշտություն չկա: Ինչ վերաբերում է կա՞կանոնադրության մեջ կետ, որն արգելում է՝ իհարկե կա: Ոչ միայն պայմանագրում կա, այլ մենք ունենք ՀՀ օրենքը՝ հիմնադրամների մասին: Հիմնադրամի սեփականությունը չի կարող օգտագործվել ի շահ իր հիմնադիրների»:
Նախադեպ կա թե չկա՝ Աղվան Հովսեփյանը նշեց. «փողերի լվացման, փողերի օրինականացման 190 հոդվածի կիրառման պրակտիկա ունենք»:
Հռիփսիմե ՋԵԲԵՋՅԱՆ
