Թեղուտի շահագործման թույլտվությունները դատական կարգով Հայաստանում վիճարկելու հնարավորությունից զրկված հ/կ-ները օրեր առաջ հարցը քննարկել են ՄԱԿ-ի Եվրոպական տնտեսական հանձնաժողովում:
Թեղուտի պաշտպանության քաղաքացիական նախաձեռնության անդամ, իրավաբան Արթուր Գրիգորյանի պատմելով, հանձնաժողովում հարցը քննարկվել է սեպտեմբերի 25-ին՝ քաղաքացիական նախաձեռնության անդամների, բնապահպանության նախարարության եւ Թեղուտը շահագործող ընկերության՝ «Վալլեքս »-ի իրավաբանի մասնակցությամբ: Վերջինս էլ, ըստ նախաձեռնության անդամի, հանդես է եկել պետության անունից. «Պետությունը չի կարող ներկայացվել մասնավոր առեւտրային ընկերության կողմից, բայց այս դեպքում պետությունը հրավիրել էր, որ իր հետ միասին Հայաստանը ներկայացներ այդ հանքարդյունաբերող ընկերության ներկայացուցիչը: Սա արդեն կոնվենցիայի 2-րդ հոդվածի խախտում է, ու մենք բարձրացրինք այս հարցը կոմիտեի առաջ, նրանք էլ խոստացան հարցին պաշտոնական լուծում տալ»:
Ա. Գրիգորյանի խոսքերով, Օրհուսի կոնվենցիայի համապատասխանության կոմիտեն Թեղուտի շահագործման թույլտվությունները դատական կարգով Հայաստանում վիճարկելու հնարավորությունից իրենց զրկելու փաստի առիթով դեկտեմբերին որոշում կընդունի: Նա կարծում է, որ կոմիտեի որոշումը Հայաստանի կառավարության կողմից հերթական անգամ Օրհուսի կոնվենցիան խախտելու արձանագրում է լինելու:
Մեր հարցին, թե ինչ է քաղաքացիական նախաձեռնությանը տալու այդ որոշումը, Ա. Գրիգորյանն ասաց. «Միջազգային պարտավորությունների իրականացման համար նախագահը, վարչապետը եւ արտաքին գործերի նախարարը անմիջական պատասխանատվութուն են կրում: Մեր ձեռքին է լինելու փաստաթուղթ , որով այդ պաշտոնյաներին ստիպելու ենք ՝ կատարեն միջազգային պարտավորություններից բխող իրենց պարտականությունները»:
Կարդացեք նաև
Հանդիպման վերաբերյալ բնապահպանության նախարարության մեկնաբանությունը կներկայացնենք առաջիկայում:
Արփինե ՍԻՄՈՆՅԱՆ
