«Հայելի» ակումբում այսօր Ստեփանակերտի օդանավակայանի գլխավոր ճարտարապետ Տիգրան Բարսեղյանը եւ քաղաքագետ Լևոն Շիրինյանը խոսեցին Ստեփանակերտի օդանավակայանի գործարկումից եւ դրանից բխող քաղաքական անցուդարձից:
Տիգրան Բարսեղյանը հայտնեց, որ օդանավակայանի կառուցման նախագիծը մշակվել է Ճարտարապետության եւ շինարարության պետական համալսարանում եւ հավանության արժանացել ԼՂՀ կառավարության նիստում. «Նախագիծը ստանձնած շինարարական կազմակերպության շնորհալի երիտասարդները ժամանակին կառուցումը հասցրեցին ավարտին, եւ այժմ Ստեփանակերտի օդանավակայանը պատրաստ է թռիչքներ ընդունել, անգամ՝ միջազգային»:
Ճարտարապետը չբացառեց օդանավակայանի շահագործման հետաձգման քաղաքական նկատառումները. «Կարծիք կա, որ Բաքուն կարող է հարվածել քաղաքացիական ինքնաթիռը: Սովորության համաձայն՝ Ադրբեջանը հոխորտում է, մենք էլ պաշտպանվում ենք: Տեսականորեն կարելի է ասել, որ կհարվածեն ինքնաթիռին, բայց չի կարելի այդպես մտածել ու նստել տանը. չթռչելու պատճառ չկա»:
Բարսեղյանի խոսքով՝ օդանավակայանի կառուցման աշխատանքներն ավարտվել էին դեռեւս նախորդ տարվա մայիսին. «Պարզվեց, որ վայրէջքի հետագծի հետ կապված ռելիեֆային աշխատանքներ են կատարվել: Ընդհանուր առմամբ՝ համալիր աշխատանքի վրա ծախսվել է 5 միլիոն դրամ: Լսել ենք, որ օդանավակայանի բացումը տեղի կունենա այս շաբաթ, բայց պաշտոնական հայտարարություն անել չեմ կարող»:
Կարդացեք նաև
Քաղաքագետ Լեւոն Շիրինյանը նկատեց, որ անկախ իրավիճակից՝ Հայաստանի դիմաց կանգնած է թուրքը, ով սովոր է հայ ժողովրդի արյան հաշվին հարցեր լուծել. «Տարածաշրջանային որոշ գործոններ հաշվի առնելով՝ օդանավակայանի շահագործումը հետաձգելը ճիշտ եմ համարում: Սակայն հիմա այլընտրանք չկա՝ պետք է թռչել: Ինչ վերաբերում է ինքնաթիռը հարվածելուն, հիշենք, որ Ռուսաստանը մինչ օրս չի մարսել Սովետմիության կողմից գնդակոծված կորեական ինքնաթիռի փաստը, որը միջազգային սկանդալ է»:
Շիրինյանի կարծիքով՝ հակառակորդին կարելի է կոտրել «պատերազմ՝ եզրագծի վրա» ամերիկյան ռազմավարական մոդելով. «Պատերազմի հասունացման իրավիճակը պահպանելով եւ բուն պատերազմի չհասնելով՝ հնարավոր է թուլացնել Ադրբեջանի նյարդերը, այլապես անընդհատ տուրք տալով նրան՝ արդյունքի չենք հասնի: Հաշվի առնենք, որ այս պայքարում իրավացի եւ օրինական է հայկական կողմի տեսակետը»:
Լեւոն Շիրինյանը ենթադրում է, որ Ատեփանակերտի օդանավակայանի գործարկմանը դրական գնահատական է տվել Միջազգային ավիացիոն կազմակերպությունը. «Դրա ներկայացուցիչներին պետք է առաջարկել մասնակցել թռիչքներին՝ թեկուզ տուրիստի կարգավիճակով: Հայ սպայի կացնահարման դեպքին հաջորդածը հաշվի առնելով՝ անհրաժեշտ է Արցախի պաշտպանության բանակը բերել առավելագույն մարտական պատրաստվածության եւ այլեւս չօգտագործել «խաղաղասեր» տերմինը»:
Լուիզա ՍՈՒՔԻԱՍՅԱՆ
