Կոնգրեսական Բրեդ Շերման (արխիվային լուսանկար)
Կոնգրեսականն իր ուղերձում կոչ է արել Ադրբեջանին դադարեցնել Հայաստանին և Արցախին ուղղված սառնալիքները
ԱՄՆ-ի Ներկայացուցիչների պալատի ավագ անդամ, Կալիֆորնիա նահանգի դեմոկրատ Բրեդ Շերմանը ողջունել է Լեռնային Ղարաբաղի մայրաքաղաք Ստեփանակերտում օդանավակայանի սպասվող բացումը:
Ամերիկայի Հայ դատի գրասենյակի կողմից տարածված հաղորդագրության համաձայն, կոնգրեսականը նաև կոչ է արել Ադրբեջանի իշխանություններին բռնություններ չկիրառել Արցախ ուղևորվող թռիչքների նկատմամբ:
«Օդանավակայանի բացումը վկայություն է բարգավաճման և խաղաղության Լեռնային Ղարաբաղի ցանկության մասին: Ես շնորհավորում եմ Լեռնային Ղարաբաղի Հանրապետությունը Ստեփանակերտում օդանավակայանի տպավորիչ վերանորոգման և մոտալուտ վերաբացման կապակցությամբ», – ասում է կոնգրեսականը՝ շեշտելով. «Ուղիղ օդային կապը Երևանի հետ կնպաստի իր ժողովրդի համար առավել պայծառ ապագա կառուցելու Լեռնային Ղաբաղի ջանքերին»:
Կարդացեք նաև
«Գիտեմ, որ օդանավակայանի բացումը մի քանի անգամ հետաձգվել է, իսկ Ադրբեջանի պաշտոնյաները հնչեցրել են Լեռնային Ղարաբաղ ուղևորվող օդանավերը խփելու սպառնալիքներ: Չնայած այս սպառնալիքների՝ Լեռնային Ղարաբաղը հաստատակամ է մնացել», – նշում է կոնգրեսականը:
«Ես հորդորել եմ ԱՄՆ -ի կառավարությունը դադարեցնել Ադրբեջանին տրամադրվող օգնությունը, զենքի փոխանցումները և նվազեցնել Ադրբեջանի զինված ուժերի հետ առկա հարաբերությունները: Միացյալ Նահանգների հետ հարաբերությունները բարելավելուց առաջ Ադրբեջանի կառավարությունը պետք է երաշխավորի, որ Արցախ ուղևորվող թռիչքների նկատմամբ չի կիրառվելու որևէ բռնություն, դադարեցնի այլ սպառնալիքները Հայաստանի և Լեռնային Ղարաբաղի նկատմամբ և արդարադատության ձեռքը հանձնի մարդասպան Ռամիլ Սաֆարովին», – եզրափակում է իր հայտարարությունը կոնգրեսական Բրեդ Շերմանը:
Արմեն Հովհաննիսյան
«Ամերիկայի Ձայն»
