57-ամյա Մարկ Բրունեն հեծանվով 2 ամիս առաջ դուրս էեկել Ֆրանսիայի հարավում գտնվող Վալանս քաղաքից, անցել ավելի քան 10 երկրների միջով (Շվեյցարիա, Գերմանիա, Ավստրիա, Սոլովակիա, Հունգարիա, Թուրքիա եւ այլն)՝ Հայաստան հասնելու համար: Հոկտեմբերի 28-ին արդեն Վալանսի հետ քույրացած Իջեւան քաղաքում էր, իսկ այսօր՝ Հայաստանում Ֆրանսիայի դեսպանատանը նա հանդիպեց լրագրողների հետ: Պարոն Բրունեի հեծանվային արշավի նպատակը Շիրակամուտի «Արեւիկ» մանկապարտեզի համար գումար հայթայթելն էր. նրան հաջողվել է շուրջ 10000 եվրո հավաքել:
Հայաստանում Ֆրանսիայի դեսպան Անրի Ռենոն Բրունեի հեծանվային հայաստանյան այցը սխրանք է որակում, ոչ սովորական առաքելություն: Բրունեն էլ ժպտալով պատմում է, որ շատերը լսելով իր նախաձեռնության մասին՝ հիացել են, զարմացել ու անակնկալի եկել:
Մարկ Բրունեն Ֆրանսիայում ունի ձայնագրման ստուդիա, ասում է՝ Հայաստանի մասին շատ է լսել գործի բերումով, իսկ 88-ի ավերիչ երկրաշարժի մասին երբեք չմոռանալով ՝ մտքին դրել է ինչ-որ ձեռնարկով օգտակար լինել մեր երկրին: Ի դեպ, Բրունեի դստեր ամուսինը ազգությամբ հայ է, բայց նրա խոսքով, փեսայի ծագումը չէ, որ ոգեւորել է իրեն անպայման օգտակար լինել Հայաստանին:
Կարդացեք նաև
Հայաստանում Ֆրանսիայի դեսպանը տեղեկացրեց, որ հեծանվորդ-բարեգործի հետ մեր երկիր են ժամանել ադեն թոշակի անցած մի խումբ ֆրանսիացի ուսուցիչներ, որոնք ՀՀ տարբեր մարզերում զբաղվելու են կադրերի վերապատրաստմամբ:
Մարկ Բրունեն ցանկություն հայտնեց առաջիկայում էլ լեռնային արշավների գնալ: Մեր ռեպլիկին՝ գնացեք Լեռնային Ղարաբաղ, պարոն դեսպանը պատասխանեց, որ Բրունեն անպայման լեռնային արշավների կմեկնի:
Հեծանվորդը պատմեց, որ ճանապարհներին ամենաջերմ վերաբերմունքի արժանացել է Մոլդովայում, Ռումինիայում ու Հայաստանում, իսկ Մերձդնեստրում զարմացել է մաքսավորների պահվածքից. իրենից մի քանի եվրո են «պոկել»:
Գոհար ՀԱԿՈԲՅԱՆ
