Գլխավոր դատախազ Աղվան Հովսեփյանը ԱԺ-ում ներկայացրեց իր միջնորդագիրը:
ՀՀԿ պատգամավոր Արտակ Դավթյանը հետաքրքրվեց՝ ինչո՞ւ է Օսկանյանի գործը քննվում ԱԱԾ քննչական վարչության կողմից, այլ ոչ թե նախորդ գումարման ԱԺ-ում ստեղծված բարձրաստիճան պաշտոնատար անձանց, նմանատիպ պարագաներում, հատուկ քննչական ծառայության կողմից:
Աղվան Հովսեփյանը պատասխանեց, որ դա եղել է իր կողմից, իր համաձայնությամբ. «Գլխավոր դատախազն իրավունք ունի քննությունը վերապահել այլ մարմնի: Ես, որպես գլխավոր դատախազ, իրավունք չունեմ հանձնարարել հատուկ քննչական ծառայությանը, բայց Հատուկ քննչական ծառայության գործերը իրավունք ունեմ վերապահել այլ մամնի, ինչը եւ ես արել եմ: Չի բացառվում, որ հետագայում ես կայացնեմ այլ որոշում»:
Կարդացեք նաև
ՀԱԿ պատգամավոր Նիկոլ Փաշինյանը հետաքրքրվեց՝ «Յուրացնելը կամ վատնելը հոդվածը՝ ուրիշի գույքի հափշտակությունը. Ձեր միջնորդագրում չտեսանք ուրիշի գույքի մասը: Արդյոք այդ մարդը, որի գույքը հափշտակվել է, բողոքե՞լ է կամ որեւէ պրիտենզիա է արել»: Պարոն Փաշինյանը նաեւ հայտարարեց, որ եթե Օսկանյան անունը փոխարինենք Աղվան Հովսեփյանով, լվացած փողերն էլ՝ «Ֆոլցվագեն» ավտոմեքենայի անունով՝ նույն հիմքով կարելի է խոսել գլխավոր դատախազի դեմ. «Մամուլում էլ եղավ, որ ձեզ սպասարկող մեքենան պատկանում է ուրիշի, այդ ուրիշի մեքենայի վրա փակցրել եք պետական համարանիշ, չի բացառվում, որ այդ գործողություններն էլ համապատասխան որակում ունենան:Բացի այդ, միջնորդագրում նշել եք՝ տարաբնույթ միջոցներ է ձեռնարկել՝ միջոցները օրինականացնելու ուղղությամբ: Ի՞նչ գործողություններ է կատարել՝ օրինականացնելու վերաբերյալ»:
Նիկոլ Փաշինյանը նաեւ նշեց, որ իր քաղաքացիական պարտքը կանի եւ ամեն ինչ կանի, որ Աղվան Հովսեփյանը պաշտոնանկ արվի՝ գործին չխոչընդոտելու համար:
Գլխավոր դատախազն էլ նշեց, որ իրենք պաշտպանում են «Սիվիլիթաս» հիմնադրամի շահերը, քանի որ այդ ուրիշը, որի գույքը ապօրինի յուրացրել է Օսկանյանը, հենց հիմնադրամն է: Նաեւ առաջարկեց Փաշինյանին. «Դուք կարող եք կատարել ձեր քաղաքացիական պարտքը և այդ հարցը ներկայացնել դատաքննչական մարմիններին` քննության առարկա դարձնելու համար, և ես ցուցմունք կտամ», -նկատեց Հովսեփյանը:
Հռիփսիմե ՋԵԲԵՋՅԱՆ
