Այսօր ԱԺ-ում քննարկվելու եւ քվեարկության է դրվելու Վարդան Օսկանյանին որպես մեղադրյալ ներգրավելու` դատախազի միջնորդությունը:
Yerkir.am-ի հետ զրույցում ԱԺ ԲՀԿ խմբակցության քարտուղար Նաիրա Զոհրաբյանը հայտնեց, որ դիմել է ԱԺ նախագահին, որպեսզի պատգամավորներին բաժանեն այն իրավական հիմնավորումները, որոնք «ջախջախում են ՀՀ գլխավոր դատախազի միջնորդությունը», սակայն ԱԺ նախագահը թույլ չի տվել նիստերի դահլիճում դրանք բաժանել: Եվ ԲՀԿ-ն որոշել է, որ այդ հիմնավորումները պատգամավորներին կբաժանվեն ԱԺ նիստերի դահլիճ տանող բոլոր երեք մուտքերի մոտ:
Մեր այն դիտարկմանը, որ ըստ ՀՀԿ-ական Սուքիաս Ավետիսյանի` ՀՀԿ նիստի ժամանակ որոշվել է ազատ թողել ՀՀԿ-ական պատգամավորներին, Նաիրա Զոհրաբյանն արձագանքեց. «Ես չեմ հավատում այդ հայտարարությանը: Ես ունեմ հակառակ ինֆորմացիա, որ խստագույնս վերահսկվելու է ՀՀԿ-ականների քվեարկությունը»:
Հարցին ի պատասխան, թե ի՞նչ ելք է կանխագուշակում, պատգամավորը խորհուրդ տվեք իրադարձություններից առաջ չընկել, բայց ընդգծեց, որ իր համար գրեթե կանխատեսելի է ելքը:
Կարդացեք նաև
Նշենք, որ քիչ առաջ ավարտվել է ԱԺ ԲՀԿ խմբակցության նիստը: ԲՀԿ-ն չի հայտարարում, թե ինչպես է մասնակցելու քվեարկությանը. կհայտարարեն նիստի ընթացքում:
