Հոկտեմբերի 19-ին պաշտպանական ճառերով հանդես կգան առանձնապես խոշոր չափերի կաշառք ստանալու մեջ մեղադրվող ՀՀ ԱԱԾ քննչական վարչության նախկին քննիչ Վլադիմիր Կոթոլյանի 3 պաշտպանները:
Երևանի Կենտրոն և Նորք-Մարաշ վարչական շրջանների դատարանում՝ դատավոր Մխիթար Պապոյանի նախագահությամբ, այսօրվա նիստում մեղադրող Աշոտ Նադոյանը հրապարակեց իր մեղադրական ճառը՝ միջնորդելով ամբաստանյալին դատապարտել 7 տարվա ազատազրկման և բռնագանձել անձնական գույքի 1/3-րդը:
Ըստ մեղադրողի, դատաքննությամբ հաստատվել է, որ ԱԱԾ քննչական վարչության նախկին քննիչ Վլադիմիր Կոթոլյանը իր վարույթում գտնվող թմրանյութերի հայտնաբերման փաստով քննություն իրականացնելիս քրեական գործ չհարուցելու, մեղավոր անձանց պատասխանատվության չենթարկելու համար ստացել է առանձնապես խոշոր չափերի՝ 4000 ԱՄՆ դոլար կաշառք: Ըստ մեղադրողի, թմրանյութերի գործով անցնող անձը՝ Հովհաննես Գևորգյանը, միշտ ամբաստանյալի դեմ տվել է մեղադրող ցուցմունքներ, իսկ տարբեր ատյաններ ուղարկած դիմումներում վերջինիս հակառակ պնդումները պայմանավորված են գործով շահագրգիռ անձանց կողմից իր նկատմամբ գործադրվող ճնշումներով:
Հիշեցնենք, որ գործով մեկ անգամ արդեն դատավճիռ կայացվել է, որով նա դատապարտվել է 7 տարվա ազատազրկման, դատավճիռը բեկանվել էր և ուղարկվել դատարան՝ նոր քննության:
