Սեպտեմբերի 29-ի առավոտյան Նոյեմբերյանի քաղաքապետ Վանուշ Ամիրաղյանն իր աշխատասենյակ է կանչել Նոյեմբերյանի մշակույթի տան տնօրեն Կարինե Ազիբեկյանին եւ առաջարկել աշխատանքից ազատման դիմում գրել: Նա Կ. Ազիբեկյանին առաջարկել է դրա փոխարեն գրադարանավարի աշխատանք՝ քաղաքի գրադարաններից մեկում:
Կարինե Ազիբեկյանն աշխատանքից ազատման դիմում չի գրել: Ազիբեկյանն ասում է, որ քաղաքապետն իրենց ողջ հանդիպման ընթացքում նստած լինելով՝ իրեն չի առաջարկել նստել:
53-ամյա Կ. Ազիբեկյանը 30 տարի պաշտոնավարում է որպես Նոյեմբերյանի մշակույթի տան տնօրեն: Նա համոզված է, որ իրեն աշխատանքից ազատվելու առաջարկի պատճառը քաղաքապետի կասկածն է, որ ինքը սեպտեմբերի 23-ի ՏԻՄ ընտրություններում չի ընտրել Վանուշ Ամիրաղյանին:
Վանուշ Ամիրաղյանին հարցրեցինք, թե ինչո՞ւ է Կարինե Ազիբեկյանին առաջարկել ազատման դիմում գրել:
Կարդացեք նաև
-Նրա հետ համատեղ աշխատանքը նպատակահարմար չեմ համարում,-ասաց 6 օր առաջ քաղաքապետ վերընտրված Վանուշ Ամիրաղյանը:
Այս տարվա մարտի 8-ին ԱԺ պատգամավոր Միքայել Վարդանյանի ֆինանսական աջակցությամբ Նոյեմբերյանի մշակույթի տունը կանանց միջազգային օրվան նվիրված միջոցառում էր կազմակերպել, որին մասնակցում էին Նոյեմբերյանի տարածաշրջանի համայնքների ղեկավարներ: Այդ միջոցառումից հետո Վանուշ Ամիրաղյանը միջոցառման մասին իրեն պատշաճ ձեւով չիրազեկելու պատճառաբանությամբ` Կ. Ազիբեկյանին նկատողություն էր հայտարարել:
Ներկայումս Նոյեմբերյանի քաղաքապետարանում եւ դրա ենթակայության հիմնարկներում կենսաթոշակառու 5-6 աշխատողներ կան, որոնց քաղաքապետը չի ազատում աշխատանքից: Նոյեմբերյանի մշակույթի տան շենքի աղաղակող թերացումներով վերանորոգումը կատարվել է Վանուշ Ամիրաղյանի քաղաքապետ պաշտոնավարման շրջանում՝ 2005-2006թթ.: Նախկինում տեղեկացրել ենք, որ հորդառատ անձրեւներից հետո սելավները լցվում են մշակույթի տուն, իսկ քաղաքապետարանը միջոցներ չի ձեռնարկում մշակույթի տան աստիճանների հարթակը փոքր-ինչ բարձրացնելու, մշակութային օջախ սելավաջրերի մուտքը կանխելու համար:
Քաղաքապետ Վանուշ Ամիրաղյանի հրահանգով քաղաքային մշակույթի տանն առանց վարձի սենյակ է տրված մշակույթի տան աշխատակից չհանդիսացող անձի:
Հավելենք, որ Վանուշ Ամիրաղյանը ՀՀԿ Նոյեմբերյանի տարածքային կազմակերպության խորհրդի նախագահի տեղակալն է, Կարինե Ազիբեկյանը՝ ՕԵԿ անդամ:
Ոսկան ՍԱՐԳՍՅԱՆ
