Այսօր ԱԺ-ում աշխատանքի եւ սոցիալական հարցերի նախարար Արտեմ Ասատրյանը ներկայացրեց 2011-ի բյուջեի հաշվետվությունը: Նրա ներկայացմամբ՝ 115 հազար 502 ընտանիք հաշվառված է եղել նպաստառուների ցուցակում, 10349 ընտանիք էլ հրատապ օգնություն է ստացել: Տարեցներից 1050 անձի տրամադրվել է շուրջօրյա ծառայություն: Մանկատների բեռնաթափում է իրականացվում:Տրամադրվել է գիշերօթիկ խնամքի եւ պաշտպանության ծառայություններ՝ 800 երեխայի համար: Ինչ վերաբերում է գործազրկության ցուցանիշներին՝ 81 հազար անձ աշխատանք փնտրող է գրանցվել այս տարվա հունվարի մեկի դրությամբ, 69 հազարը գրանցվել է որպես գործազուրկ:
ՀՀԿ պատգամավոր Մարգարիտ Եսայանը նախարարից հետաքրքրվեց «Սոցիալական ոլորտն ամենախոցելի, ամենատեսանելի եւ շոշափելի ոլորտն է: Այն խավը, որը Դուք եք սպասարկում, միշտ դգոհություններ ունի եւ կարիք ունի պետական հոգածության: Այդ ծրագրերը որքանո՞վ են նպաստել, կա՞ վիճակագրություն, որ ասենք, դիմում-բողոքների թիվը դրանց արդյունքում պակասել է: Ձեզանից այս կամ այն խավը ավելի գո՞հ է, թե՞ ավելի դժգոհ է»:
Պարոն Ասատրյանը պատասխանեց. «Ընտանեկան նպաստի միջոցների շուրջ 76 տոկոսն ուղղվում է ուղղակի աղքատներին, ինքը համարվում է բավականին լավ ցուցանիշ՝ տարածաշրջանի երկրներում իրականացվող նմանատիպ ծրագրերի համեմատությամբ: Իսկ սա նշանակում է, որ սոցիալական պաշպանության ոլորտի հիմնական ծրագրերն իրենց առջեւ դրված խնդիրները կատարում են, այսինքն՝ ուղղվում են առաջին հերթին այն անձանց, ովքեր ունեն խնդիր: Գոհ կամ դժգոհ լինելը վերաբերում է մատուցվող ծառայությունների որակին: Այն աշխատանքները, որ հիմա տարվում են՝ ուղղված են հենց այդ որակի բարձրացմանը»:
Կարդացեք նաև
ՀՀԿ պատգամավոր Արմեն Մխիթարյանը հետաքրքրվեց՝ կապված պատերազմի վետերանների այն արտոնություններից, որոնք վերացան. «Այսօր մոտավորապես արտոնությունը 5000 դրամի սահմաններում է տրվում: ՌԴ-ում 80-100 դոլար է, Կիրգիզիան, որ մեր նման երկիր է՝ 143 դոլարի չափով է: Լավ կլիներ ամեն տարի գոնե 1000 դրամի չափով ավելացվեին, որովհետեւ այդ մարդիկ առողջական խնդիրներ ունեն, սոցիալական խնդիրներ ունեն եւ այդ գումարը մեծ գումար չէ»: Սա ասվեց՝ 2013-ի բյուջեն քննարկելիս հաշվի առնելու համար:
Հռիփսիմե ՋԵԲԵՋՅԱՆ
