ՀՀ մշակույթի նախարարության սեպտեմբերի 29-30-ը կազմակերպած «Եվրոպական ժառանգության օրերի» շրջանակում մայրաքաղաքի եւ մարզերի պատմամշակութային հուշարձաններ եւ հիսունից ավելի թանգարան կներկայանան շուրջ 110 միջոցառումով եւ հատուկ ներկայացումներով: Այս մասին, այսօր Եղիշե Չարենցի թանգարանում կազմակերպված հանդիպման ժամանակ ասաց ՀՀ մշակույթի փոխնախարար Արեւ Սամուելյանը. «Եվրոպական ժառանգության օրերն» անցկացվում են ամեն տարի աշնանը՝ հիսունից ավելի եվրոպական երկրում: Միջոցառումը հասարակությանը հնարավորություն է ընձեռում ճանաչել եւ բացահայտել մշակութային ժառանգությունը եւ իրականացվում է Եվրախորհրդի եւ Եվրամիության հետ համատեղ՝ «Ճանապարհ» խորագրով: Խորագիրը բազմաթիվ իմաստներ ունի եւ կարող է ընկալվել որպես «Հոգեւոր ճանապարհ», «Գրական ճանապարհ», «Մետաքսի ճանապարհ»:
Փոխնախարարը հավելեց, որ «Մշակութային ժառանգություն» ֆեյսբուքյան էջը ուսանողներին հրավիրում է մասնակցելու «Մշակութային ժառանգություն՝ հնի եւ նորի ճանապարհ» եւ «Հուշարձանները մեր ընտանեկան ֆոտոալբոմում» խորագրերը կրող մրցույթներին:
Հայաստանում Եվրախորհրդի գլխավոր քարտուղարի հատուկ ներկայացուցիչ Սիլվիա-Մարիա Զեհեի խոսքով՝ եվրոպական ժողովուրդներն ունեն հարուստ մշակութային ժառանգություն, որը պետք է հասանելի դարձնել հասարակությանը. «Այս ծրագիրը քաղաքային իշխանություններին կարծես զգուշացնում է, որ անհրաժեշտ է պահպանել պատմամշակութային ժառանգությունը, որի առջեւ այսօր մի շարք մարտահրավերներ են դրված: Ծրագրի մասնակից Եվրամիության կոնվենցիան ընդունած երկրների ցանկում Հայաստանը հարուստ ներկայացուցիչ է: Ամեն օր զբոսնելով Երեւանում՝ ինձ համար հետաքրքիր, եւ հին շենքեր ու հուշարձաններ եմ բացահայտում»:
Կարդացեք նաև
Սիլվիա-Մարիա Զեհեն հավելեց, որ նախորդ տարվա «Եվրոպական ժառանգության օրերին» Էրեբունի պատմամշակութային արգելոց-թանգարանում ներկա է եղել սեպագիր արձանագրությունների ցուցահանդեսին. «Այդ նմուշները մարդկային գրավոր խոսքի առաջին վկայությունն են, եւ կարծում եմ՝ ցուցահանդեսի թեման դիպուկ էր ընտրված»:
Հանդիպման ընթացքում չարենցյան բանաստեղծությունների ասմունքով հանդես եկան Չարենցի անվան թիվ 67 միջնակարգ դպրոցի սաները:
Նշենք նաեւ, որ ծրագրին միացած բոլոր թանգարանների մուտքը սեպտեմբերի 29-ին և 30-ին անվճար է: Եղիշե Չարենցի տուն-թանգարանը կներկայանա «Չարենցի ստեղծագործական ուղին» ցուցահանդեսով եւ «Չարենցը՝ հավերժի ճամփորդ» բեմականացմամբ:
Լուիզա ՍՈՒՔԻԱՍՅԱՆ
