«Եվրասիա նեթ» լրատվականը գրում է, որ հայ պաշտոնյաները շատ արագ իրենց անհանգստությունն են հայտնում Վրաստանում, Ադրբեջանում և Թուրքիայում հայկական եկեղեցիների ոչնչացման կամ քայքայման վերաբերյալ, սակայն շրջակա միջավայրի պաշտպանները բողոքում են, որ այդ նույն պաշտոնյաները անհանգիստ չեն երկրի ներսում եղած եկեղեցիների վիճակով:
Մասնագետները պնդում են, որ Հայաստանի 2400 կրոնական կառույցներից 50 տոկոսը անհապաղ վերականգնման կարիք ունի, իսկ 30 տոկոսը փլուզման եզրին է:
«Մեր պաշտոնյաներից ո՞վ է տեսել մեր եկեղեցիների վիճակը», – պատմաբան, հանրային խորհրդի անդամ Ռաֆայել Թադևոսյանի խոսքն է փոխանցում լրատվականը:
«Գեղարդավանքի շրջակայքում այնքան աղբ է թափված, ինչքան քաղաքային աղբանոցներում է թափված», – պատմաբան, հուշարձանագետ Սամվել Կարապետյանի խոսքն է փոխանցում թերթը, – «Ու դա թուրքերը, ադրբեջանցիներն ու վրացիները չեն անում: Մենք ենք, որ աղտոտում ենք, պղծում ենք, ավերում ենք»:
Կարդացեք նաև
ՀՀ մշակույթի փոխնախարար Արև Սամուելյանը լրատվականին հայտնել է, որ խնդիրները վերահսկողության տակ են և համարում է, որ այդ խնդիրների լուծմամբ ողջ հասարակությունը պետք է զբաղվի. «Պետությունը կամ եկեղեցին չեն կարող բոլոր եկեղեցների մոտ պահակ կանգնեցնել, որ մարդկանց թույլ չտան պատերին գրել: Հասարակությունը պիտի սկսի անհանգստանալ հուշարձանների համար», – ասել է Արև Սամուելյանը և ավելացրել, որ մշակույթի նախարարությունը ամենազոր չէ:
