Այսօր Վերաքննիչ դատարանում ՀԱԿ ակտիվիստների դատավարությանը պաշտպան Վահե Գրիգորյանը նշեց, որ դատավորը հիմնվել է բացառապես միայն ոստիկանների ցուցմունքների վրա: Իսկ այդ ցուցմունքները, ինչպես նաեւ քննիչների ցուցմունքները ուղղորդվել են ոստիկանապետի կողմից: Վահե Գրիգորյանը նաեւ ներկայացրեց, թե ինչպես են պարզ իրողության մեջ ապացուցել, որ ոստիկանները դատարանում ստում են: Բոլոր ոստիկանները պնդել են, որ դեպքի վայրում՝ Խնկո -Ապոր գրադարանի մոտ, որտեղ տեղի է ունեցել միջադեպը, տեսել են Անի Գեւորգյանին, որը Սարգիս Գեւորգյանի քույրն է: Ըստ ոստիկանների, նա մասնակցել է միջադեպին, նկարահանումներ է արել: Երբ ոստիկաններից մեկին, որը պնդել է, որ ճանաչում է Անիին, տեսել է նրան, նա եղել է այդ օրը դեպքի վայրում, խնդրել են ասել՝ այդ պահին դահլիճում կա՞ Անի Գեւորգյանը՝ վերջինս շրջվել է, զննել է դահլիճում ներկաներին ու ասել, որ Անին դահլիճում չէ: Մինչդեռ Անին նստած է եղել ուղիղ նրա հետեւում:
Դատավորը փորձեց ճշտել, թե ի՞նչ կապ դա կարող էր ունենալ կոնկրետ բողոքի հետ: Վահե Գրիգորյանը մանրամասնեց, որ ոստիկաններին պետք էր, որ նշվեր, որ Անի Գեւորգյանը եղել է դեպքի վայրում ու տեսանկարահանումներ է արել, որովհետեւ ոստիկան Շահեն Հարությունյանն է իրականում ամբողջը տեսանկարահանել, եւ եթե պահանջվեր նրանից ներկայացնել տեսանյութը, նա ի պատասխան պետք է ստիպեր, որ մյուս կողմն էլ ներկայացնի իր տեսանկարահանածը, ինչը չկա: Ըստ Վահե Գրիգորյանի. «Ոստիկան Շահեն Հարությունյանը իր I Phone-ով նկարել է եւ առեղծվածային պայմաններում կորցրել այդ հեռախոսը: Բայց ոստիկանը, որի աշխատավարձը 10 անգամ ցածր է այդ հեռախոսից, հայտարարություն չի տվել»:
Հռիփսիմե ՋԵԲԵՋՅԱՆ
