Գյումրու նորընտիր քաղաքապետ Սամվել Բալասանյանը, օրերս հանրային հեռուստատեսությանը տված իր հարցազրույցում խոսելով Գյումրու ունեցվածքի մասին, ակնարկեց, որ քաղաքը մնացել է առանց այգիների, դրանք 99 տարով վարձակալության են հանձնել անհատների: Նա հասկացրեց, որ գույքագրում սկսելիս, զբաղվելու է նաև այս հարցով: Նշենք, որ քաղաքի այգիները, այդ թվում նաև Գորկու կենտրոնական այգին, որը գտնվում է Վարդան Ղուկասյանի հարազատ թաղում`Սալբոդկայում, և որտեղ նկարահանվել են մի քանի ֆիլմեր, այդ թվում նաև «Մեր մանկության տանգոն» ֆիլմը, այսօր հենց քաղաքապետի սեփականությունն է համարվում:Այնտեղ տեղակայված է Ղուկասյան ընտանիքին պատկանող «Օազիս» ռեստորանը: Այսօր Aravot.am-ը «Բիոսոֆիա» բնապահպանական հ/կ ղեկավար Գևորգ Պետրոսյանից հետաքրքրվեց` մի՞թե հնարավոր է այդ այգիները դարձյալ համայնքին վերադարձնել: «Իհարկե հնարավոր է, 99 տարի կոչվածը դոգմա չէ, ավագանին կարող է չեղյալ համարել նախորդ ավագանու որոշումը, սակայն չեմ կարծում ճիշտ կլինի միանգամից բիզնեսմենի ձեռքից հետ վերցնել դրանք: Չէ՞ որ նրանք էլ մեծ փող են ներդրել, նույն սկզբունքով ամբողջ քաղաքը պետք է վերցնենք, ամբողջ կանաչ տարածքները արդեն ոչնչածված են ու վարձակալության են հանձնված:Կարծում եմ , վերանայելով նախորդ ավագանու որոշումները, պետք է փոփոխություններ կատարել, որոշակի պայմաններ դնել այն մարդկանց առջև, ովքեր բիզնեսի օբյեկտներ են կառուցել կանաչ տարածքներում, նրանց պետք է հարկադրել իրենց ոչնչացրածի փոխարեն տասնապատիկը, հարյուրապատիկը անել, սեփական միջոցների հաշվին բարեկարգել ու կանաչապատել: Այլապես եթե ձեռքից հետ վերցնենք, կանաչապատումը պետք է մնա համայնքի վրա, իսկ համայնքային բյուջեն այդքան միջոցներ չունի, ուստիև պետք է հարկադրել վարձակալներին սեփական միջոցներով հատուցել իր ոչնչացրածը: Այս դեպքում և բիզնեսմենը չի տուժվի , նրա հետ ավագանին ու համայնքապետը կոնֆլիկտի մեջ չեն մտնի, և կանաչապատման հարցը կլուծվի: Ես նորից եմ կրկնում, կողմ չեմ, որ տան սպանեն, թե վատ բան ես արել, եթե ավագանին խելամիտ որոշում կայացնի, կկարողանա հարցը կարգավորել:Ուղղակի մտահոգողն այն է, որ չգիտես ով ինչ նպատակով է ավագանու անդամ դարձել, ինչո՞ւ են եկել, չստացվի էնպես, որ ամեն մեկը փորձի կրակը իր թառի տակ քաշել, մեկի ձեռքից չառնեն տան մյուսին»,- ասաց մեր զրուցակիցը:
Իսկ Գորկու այգու հարցը ինչպե՞ս կարելի է լուծել, չէ՞ որ այն սեփականաշնորհված է Գյումրու քաղաքապետի կողմից, հո՞ չեն կարող մարդուց սեփական գույքը խլել, մեր այս հարցին բնապահպանը պատասխանեց. « Միգուցե օբյեկտը սեփականաշնորհված լինի, բայց չեմ կարծում, որ տակի հողը սեփականաշնորհված է»: Նշենք, որ այն կանաչ գոտի է , և քաղաքապետ Վարդան Ղուկասյանի «Օազիս» ռեստորանը կառուցվել է Հողային օրենսգրքի 60-րդ հոդվածի խախտմամբ, նա իրավունք չուներ կանաչ տարածքում որևէ օբյեկտ կառուցել:
Կարդացեք նաև
Նունե ԱՐԵՎՇԱՏՅԱՆ
