«Հայելի» մամուլի ակումբում անդրադառնալով դատախազության միջնորդությանը՝ ԲՀԿ-ական պատգամավոր Վարդան Օսկանյանին «Սիվիլիթասի» գործով որպես մեղադրյալ ներգրավելու եւ անձեռնմխելիությունից զրկելու վերաբերյալ, ՀԱԿ ներկայացուցիչ Սոս Գիմիշյանը կարծիք հայտնեց, որ այս ամբողջ աղմուկը Վարդան Օսկանյանի եւ ԲՀԿ-ի օգտին է: Նրա տպավորությամբ՝ հիմա հիշելով Օսկանյանի գործունեության մութ էջերը, իշխանությունը նպատակ է հետապնդում PR եւ քաղաքական նմանատիպ տեխնոլոգիաներով վերջինի համար ապահովել՝ երկրորդ տեղը նախագահական ընտրություններում, այդպիսով, ՀԱԿ ներկայացուցչի կարծիքով, իշխանությունը փորձում է, ի դեմս Օսկանյանի, ընդդիմադիր բեւեռ ստեղծել: Հետեւաբար Գիմիշյանը չի կարծում, թե Օսկանյանին երբեւէ կդատապարտեն: Ամեն դեպքում, նա դեմ է պատգամավորին անձեռնմխելիությունից զրկելուն, քանի դեռ չկա դատարանի վճիռ: Գիմիշյանի համար Վարդան Օսկանյանը շարունակում է մնալ «մարտի 1»-ի պատասխանատուներից մեկը: Գիմիշյանը կարծում է, որ երկուշաբթի օրը խորհրդարանում հարցի քննարկման ժամանակ ՀԱԿ խմբակցությունը դեմ քվեարկի:
Հանրապետական Լեռնիկ Ալեքսանյանը ձեռնպահ է մնում առայժմ հստակ դիրքորոշում արտահայտելուց: Հարցը քաղաքական է, թե ոչ, նրա կարծիքով, գործընթացի վերջում կերեւա, քանի որ Օսկանյանին բավականին լուրջ մեղադրանք է առաջադրված: Ինչ մնում է անձեռնմխելիությունից զրկելուն, Լեռնիկ Ալեքսանյանի կարծիքով, առանց դրա հնարավոր չէ խորը քննություն անել. «Չեմ կարծում՝ դատախազությունը այդքան պրիմիտիվ է, որ Օսկանյանի նման քաղաքական-պետական գործչին առանց հիմքերի այդպիսի մեղադրանք առաջադրի»:
Լրագրողների դիտարկմանը, որ այս ամենը շարունակությունն է հետխորհրդարանական ընտրությունների շրջանում ԲՀԿ-ի դեմ սկսված «վհուկների որսի», այդ թվում՝ նաեւ ԲՀԿ-ական նախկին նախարարներին առաջադրվող մեղադրանքների, Լեռնիկ Ալեքսանյանը հակադարձեց, որ կոռուպցիայի դեմ սկսած նախագահի պայքարում զոհ են գնում նաեւ հանրապետական չինովնիկները, հետեւաբար ճիշտ չէ հարցը ՀՀԿ-ԲՀԿ հարաբերություններ տեղափոխելը: Ընդհանրապես, Լեռնիկ Ալեքսանյանը շատ դրական է գնահատում նախագահի նախաձեռնությունը բոլոր առումներով:
Նելլի ԳՐԻԳՈՐՅԱՆ
Կարդացեք նաև
