Այսօր «Հայելի» ակումբում Հայ ազգային կոնգրեսի անդամ «Քրիստոնեաժողովրդական վերածնունդ» կուսակցության ղեկավար Սոս Գիմիշյանը եւ հանրապետական Լեռնիկ Ալեքսանյանը համակարծիք էին, որ ՀԱԿ խորհրդարանական խմբակցության «Մարտի 1»-ի գործով նոր խորհրդարանական հանձնաժողով ստեղծելու նախաձեռնությունը քաղաքական է: Բանախոսները, սակայն, այդ քաղաքական խնդրին տարբեր տեսանկյուններից են նայում: Լեռնիկ Ալեքսանյանի կարծիքով, օրինակ, նախագահական ընտրություններից առաջ եւ Հայաստանի առջեւ ծառացած արտաքին բազմաթիվ մարտահրավերների ֆոնին հանձնաժողով ստեղծելու նախաձեռնությունը ընդամենը «մարտի 1»-ի թեման շահարկման համար է. «Ես դեմ չեմ հանձնաժողով ստեղծելուն, դա կարեւոր հարց է, բայց շատ կարեւոր է նաեւ ժամանակի ընտրությունը: Ի վերջո, նման մի հանձնաժողով եղել է, լավ-վատ բացահայտումներ արել է եւ այդ թեման հիմա անցած-գնացած էտապ է: Դաստիարակչական խնդիր է լուծելու, եթե 5 ամիս հետո էլ լինի՝ կլինի»: Իսկ Սոս Գիմիշյանի տեսանկյունից, նույնիսկ քաղաքական նկատառումը դրական է, քանի որ ՀԱԿ պատգամավորները խորհրդարան մտնելով չէին կարող առաջինն այդ խնդիրը չբարձրացնել: Ինչեւէ, պարոն Գիմիշյանը խիստ կասկածներ ունի, որ նման հանձնաժողով խորհրդարանում կստեղծվի կամ որ նկատելի արդյունքներ կարձանագրի: Նա համոզված է, որ «մարտի 1»-ի խնդիրը կբացահայտվի միայն այն ժամանակ, երբ այդ հարցը հետապնդող ուժերը կգան իշխանության:
Նելլի ԳՐԻԳՈՐՅԱՆ
