Հետաքննող լրագրող Սառա Պետրոսյանը Aravot.am-ին պատմել էր, որ Կոտայքի մարզպետ Կովալենկո Շահգալդյանը Չարենցավանում բնակվող մի լրագրողի կանչել է իր մոտ եւ մի լավ հայհոյել այն բանի համար, որ նա մի քանի սենսացիոն տեղեկություններ է հրապարակել մարզպետի` աշխատանքի ընթացքում տեղի ունեցած մութ գործերից: Սպառնալիքների արդյունքում՝ լրագրողը ստիպված է եղել թողել աշխատանքը: Aravot.am-ն այս առնչությամբ մարզպետից հետաքրքրվեց, թե չի՞ արժանանա նույն բախտին, եթե մի քանի հարց տա: Կովալենկո Շահգալդյանն ի պատասխան՝ վստահեցրեց. «Ես լրագրողների հետ շատ ջերմ, ընկերական, գործնական հարաբերությունների մեջ եմ: Երբեւէ որեւէ լրագրողի չեմ հայհոյել: Կհայհոյեմ այն պարագայում, երբ իրանք կփորձեն իմ ինքնասիրությունը կամ արժանապատվությունը վիրավորել: Այդպիսի դեպք չի եղել: Ես արդեն 12 տարվա մարզպետ եմ, որ լրագրողներն իրենց ճիշտ են պահել, իրենց դերի մեջ են եղել, իրենց պարտականությունների կատարման շրջանակից դուրս չեն եկել, բոլորի նկատմամբ բարեհամբույր վերաբերմունք եմ ունեցել»: Մեր դիտարկմանը, որ մենք էլ մտածեցինք գեներալ Մանվելի պես լրագրողներին հայհոյում ճանապարհում եք՝ նա պատասխանեց. «Բայց ինձ համեմատում եք ուրիշի հե՞տ, նմա՞ն եմ: Այո, ես շատ պահանջկոտ եմ: Լրագրողը, ով ուզում է իմ հետ հարաբերվի, ասում եմ՝ իմ ասածը առանց անլուրջ մեկնաբանությունների պետք է դրվի: Այլ պարագայում ես մի քիչ ավելի կոպիտ եմ եւ պահանջկոտ եմ, չեմ հանդուրժում այն մարդկանց, ովքեր տողատակերով են խոսում կամ աղավաղում են»:
Հռիփսիմե ՋԵԲԵՋՅԱՆ
