Բարեփոխումների դեմ են հադես գալիս ծնողներն ու ուսուցիչները, սակայն կառավարությունը չի նախատեսում հետ կանգնել կրթական համակարգում փոփոխությունների ծրագրերից
Թուրքիայի բազմաթիվ դպրոցականների ծնողների համար այս տարի անակնկալ է դարձել այն հանգամանքը, որ իրենց երեխաների դպրոցներն նոր ուսումնական տարվանից վերածվել են «իմամ-հաթիբների»՝ կրոնական ուսումնական հաստատությունների:
Նման փոփոխությունները մաս են կազմում այս երկրում ուսումնական համակարգի անցկացվող բարեփոխումների, որոնք իրականացնում է Թուրքիայի մահմեդականամետ կառավարությունը:
Որոշ ծնողներ դեմ են հանդես գալիս դպրոցները կրոնական ուսումնական հաստատությունների վերածելու, սակայն ոմանք ողջունում են կառավարության նման քայլերը՝ ասելով, որ «մենք մահմեդական երկիր ենք, հետևաբար կրոնը պետք է ընդգրկված լինի ուսումնական պլանում»:
Կարդացեք նաև
Ստամբուլի «իմամ-հատիփ» տեսակի կրոնական ուսումնական հաստատություններից մեկում, որը հիմնադրվել է իմամներ պատրաստելու նպատակով, սովորել է Թուրքիայի այժմյա վարչապետ Ռեջեփ Թայիփ Էրդողանը: Այս տեսակի դպրոցների ուսումնական պլանն այժմ ընդգրկում է սովորական կթական ծրագիրը, ինչպես նաև կրոնի ուսումնասիրություն, որին հատկացվում է մի քանի ժամ:
«Իմամ-հատիփ» տեսակի դպրոցները դրանց ստեղծման ժամանակից՝ 1950-ական թվականներից դարձել են բանավեճի աղբյուր, քանի որ Թուրքիան համարվում է աշխարհիկ պետություն: Նման բազմաթիվ դպրոցներ փակվել են 1990-ականներին, երբ աշխարհիկ պետություն պահպանելու կողմ հանդես եկող զինված ուժերը բռնություններ են գործադրել երկրում թափ հավաքող իսլամիստական շարժման ներկայացուցիչների նկատմամբ:
Թուրքիայում իշխանության գլուխ կանգնած կուսակցությունն այս տարվա սկզբին մեծ ջանքեր է գործադրել, որպեսզի կառավարությունն ընդունի երկրի դպրոցներում կրթական բարեփոխումներ անցկացնելու մասին մի օրենք, որը թույլ է տալիս դպրոցներին մասնագիտանալ կրոնական կրթության ոլորտում՝ միաժամանակ դասավանդելով ժամանակակից ուսումնական պլանով նախատեսված առարկաներ: Նման որոշումը հրահրել է երկրի աշխարհիկ բնակչության և ուսուցիչների բողոքի ցույցեր: Վերջիններս պնդում են, որ այս օրենքը առաջ է քաշում իսլամիստական գաղափարախոսությունն ու վտանգում է կրթական ստանդարտները:
Թուրքիայի վարչապետ Ռեջեփ Թայիփ Էրդողանը սակայն քննադատության է ենթարկել «իմամ-հատիփ» դպրոցների և դրանց թվի ավելացման դեմ բողոքողներին, իսկ երկրի կրթության նախարարն ասել է, թե «բարեփոխումների ընդդիմախոսները սատարում են ահաբեկչությունը կամ մոլի աշխարհականներ են»:
Նման քննարկումները վկայում են այն մասին, որ կրթության ոլորտը Թուրքիայի բևեեռացած հասարակության համար կարող է դառնալ ևս մեկ «մարտադաշտ»:
Արմեն Հովհաննիսյան
Ամերիկայի Ձայն
