ՄԱԿ-ի գլխավոր ասամբլեան իր տարեկան ժողովի ընթացքում շարունակում է քննարկումները: Չնայած որոշ միջազգային լրատվամիջոցների փոխանցմամբ՝ դրանք երբեմն այնքան ձանձրալի են թվում, որ անգամ ԱՄՆ պետքարտուղար Հիլարի Քլինթոնն է քննարկումների ժամանակ սկսում թղթի վրա գրիչով խզբզել, կամ դեմքի ծամածռություններ անել, այնուամենայնիվ ՄԱԿ-ի Գլխավոր ասամբլեան անդրադառնում է նաև անդամ երկրների համար հրատապություն ներկայացնող թեմաների:
Այս օրերին Գլխավոր ասամբլեայի քննարկման թեմաներից մեկն էլ Աֆրիկայում տուբերկուլյոզի, մալարիայի և ՄԻԱՎ/ՁԻԱՀ վարակի տարածվածության բարձր աստիճանն էր: Այս առումով ՄԱԿ-ի անդամ երկրների մի շարք ղեկավարներ կարծիք հայտնեցին, որ խնդրի լուծման ճանապարհներից է կրթության որակի բարձրացումը,մոր և մանկան առողջության ապահովումը, միջավայրի աղտոտվածության խնդրի լուծումը:
ՄԱԿ-ի ամբիոնից հնչեցված ցուցանիշները մտածելու տեղիք էին տալիս: Օրինակ՝ հայտարարվեց, որ Աֆրիկայում 23,5 միլիոն մարդ վարակված է ՄԻԱՎ/ՁԻԱՀ-ով: Ավելի մտահոգիչ է այն փաստը, որ ի հեճուկս բոլոր կանխարգելիչ միջոցառումների՝ վարակվածության աստիճանը տարեցտարի աճում է:
Կարդացեք նաև
ՄԱԿ-ի UNAIDS գործակալության գործադիր տնօրեն Միշել Սիդիբեն այս կապակցությամբ հայտարարեց. «Յուրաքանչյուր աֆրիկացի ունի առողջ լինելու իրավունք, ուստի այս գիտակցությունը պետք է ներարկել Աֆրիկայում բնակվող յուրաքանչյուր աֆրիկացու գիտակցության մեջ: Սակայն խնդրի լուծումը կախված է նաև բարելավված դատաիրավական համակարգից, օրենքների գործունակ լինելուց, և միջազգային հադուրժողականությունից աֆրիկացիների նկատմամբ»:
Բենինի նախագահ Բոնի Յային էլ նշեց. «Նմանատիպ և այս ծավալի հարցերը միայն տեղական ֆինանսավորմամբ լուծել հնարավոր չէ: Ուստի վարակի տարածվածության աստիճանն ու ծավալները կարող են նվազել միայն միջազգային հանրության ֆինանսական աջակցության և Աֆրիկայի նկատմամբ ստեղծված կարծրատիպի փոփոխության արդյունքում, քանի որ հազարավոր աֆրիկացի մայրեր և երեխաներ սպասում են միջազգային բարեգթությանը»:
Տաթև ՀԱՐՈՒԹՅՈՒՆՅԱՆ
