Հայաստանի մարզերում օթեւան գտած սիրիահայ փախստականների բնակարանների բնակվարձերը կտա Հայկական բարեգործական ընդհանուր միությունը (ՀԲԸՄ)` հաշվի առնելով, որ այսօր մեր երկիր ժամանած շատ սիրիահայեր աշխատանք չունեն:
Ըստ Հայոց եկեղեցու Դամասկոսի թեմի քաղաքական մարմնի ատենապետ Վազգեն Յակուբյանի, այն սիրիահայերը, որոնք նախընտրում են Երեւանում վարձով բնակվել, քիչ թե շատ ապահովված են եւ իրենց հետ որոշ կարողություններ բերել են. «Սակայն կան ընտանիքներ, որոնք կենաց- մահու կռիվ տալով են հասել Հայաստան, եւ մենք նրանց պիտի օգնենք»:
Այսօր ՀԲԸՄ Հայաստանի ներկայացուցչությունում տեղի ունեցած ասուլիսում միության պատասխանատուները հայտնեցին, որ սիրիահայերի կարիքների համար 1 միլիոն դրամ օգնություն են տրամադրել: Նրանք կոչով նաեւ դիմել են սփյուռքահայերին` լրացուցիչ օժանդակության ակնկալիքով: $150 հազար էլ կոչից հետո է հավաքվել: Այդ գումարներով սիրիահայ ընտանիքներին տրամադրվել է սնունդ, դեղորայք, ջուր, այլ պարագաներ:
Կարդացեք նաև
Սիրիայում գտնվող միության կենտրոններն այս օրերին նաեւ ծառայում են որպես ապաստարաններ:
Վազգեն Յակուբյանի տվյալներով, Սիրիայում ապրել է 80-90 հազար սիրիահայ, սակայն նրանցից ոմանք լքել են բնակավայրերը եւ տեղափոխվել հարեւան կամ հեռավոր երկրներ, Հայաստան: Նրանց թիվը մեր երկրում այս պահին մոտ 3500-4000 է:
Միությունը սիրիահայերին օգնում է նաեւ կրթություն ստանալու հարցում. այն հայերը, որոնք օտար երկրում հայկական դպրոց են ցանկանում հաճախել, ըստ Վազգեն Յակուբյանի, կրթաթոշակի հարցերը միությունն է հոգում:
Լուսինե ԲՈՒԴԱՂՅԱՆ
