«Ձեր ուժը բխում է նրանից, որ չշեղվեք ձեր բուն մանդատից: Հենց սկսեք քաղաքականությամբ զբաղվել՝ կկորցնեք ձեր դերը»,-այսօր «Մարիոթ»
հյուրանոցում հասարակական կազմակերպությունների ներկայացուցիչներին այսպիսի խորհուրդ տվեց ԵՄ ընդլայնման եւ Եվրոպական Հարեւանության քաղաքականության հարցերով հանձնակատար Շտեֆան Ֆյուլեն:
Պարոն Ֆյուլեն Հայաստան է ժամանել քաղաքացիական հասարակության զարգացմանը նվիրված երկօրյա սեմինարին մասնակցելու:
Հանձնակատարը դրական համարելով, որ մեր երկրում «Ֆեյսբուքի» կամ այլ սոցցանցերի միջոցով հաջողվում է մեծ թվով մարդկանց համախմբել` այս կամ այն ակցիային մասնակցելու համար, կոչ արեց առավել ակտիվ օգտագործել տեխնոլոգիաները. «Մի վախեցեք, այն ձեր թշնամին չէ»:
Կարդացեք նաև
Aravot.am-ը Էկոլոգիական դաշինքի համակարգող Սիլվա Ադամյանից հետաքրքրվեց, թե այսօր որքանով է կայացած մեր երկրում քաղաքացիական հասարակության ինստիտուտը եւ ինչ խոչընդոտներ կան դրա զարգացման համար: Տիկին Ադամյանի պատասխանը` տեսանյութում.
ՀՀԿ խմբակցության պատգամավոր Սամվել Ֆարմանյանի կարծիքով, մեր երկրում քաղաքացիական հասարակությունը անկախության 21 տարիների ընթացքում գնալով ավելի է ուժեղանում. «Գնալով մենք ինքներս ականատեսն ենք լինում շատ ու շատ մակարդակներում կայացվող որոշումների, որոնք ուղղակի հետեւանքն են քաղաքացիական հասարակության կազմակերպված աշխատանքի:
Ես դրական եմ գնահատում այն ինչ մենք ունենք` պետական կառավարման համակարգում շատ կարեւոր փոփոխություններ են տեղի ունենում: Մենք պետք է հասարակական կազմակերպություններին չնայենք, որպես հակառակ կողմում կանգնած, այլ` որպես դաշնակից: Քաղաքացիական հասարակությունն այն բանն է, որն ընդունում է, հանդուրժում է նույն խնդրի վերաբերյալ ամենատարբեր կարծիքներ այդ թվում եւ ծայրահեղական»:
Մեր հարցին, թե այսօր իշխանությունների կողմից շատ է շահարկվում , թե հատկապես բնապահպանական ուղղվածությամբ /հկ-ները, որոնք այդքան ակտիվորեն պայքարում են վտանգավոր եղանակով հանքարդյունաբերության, կանաչ տարածքների ոչնչացման դեմ, դրսից են հովանավորվում եւ «փիս-փիս» նպատակներ են հետապնդում, պարոն Ֆարմանյանն ասաց. «Եթե հ/կ-ները պայքարում են, որպեսզի մեր բնությունը լինի ավելի պաշտպանված, մարդու իրավունքները Հայաստանում հարգվեն, ինձ բացարձակ հետաքրքիր չէ, թե ֆինանսավորողի դերում ով է հանդես գալիս: Խնդիրը գաղափարի, եւ էության մեջ է: Ես էլ, որպես քաղաքական գործիչ, միշտ չէ, որ համաձայն եմ հ/կ-ների միջոցով արտահայտած բոլոր կարծիքներին»:
Aravot.am-ի հետ զրույցում, Գլոբալիզացիայի եւ տարածաշրջանային համագործակցության վերլուծական կենտրոնի խորհրդի նախագահ Ստեփան Գրիգորյանն ասաց. «Հայաստանում քաղաքացիական հասարակությունը բավական ակտիվ է: : Գաղտնիք չէ, որ կան շատ հ/կ-ներ, որոնք արհեստական են, կամ միայն թղթի վրա են, բայց մեզ մոտ վիճակն այդ առումով այդքան վատ չէ ինչպես պատկերացնում ենք: Ֆյուլեի Հայաստան գալը հենց դրա ապացույցն էր: Հ/կ-ների դերը հենց նրանում է, որ իրենք հարցը չքաղաքականացնելով իրենց ուզածն անցկացնեն: Հայաստանում բավական դանդաղ եւ անհաջող է գնում բազմակուսակցությունը, շատ կուսակցություններ, հասկանալի չէ, ընդհանրապես ունեն ծրագրեր թե ոչ, շատերը զբաղվում են պրիմիտիվ քննադատությամբ, եւ այդ պարագայում շատ կարեւոր է քաղաքացիական հասարակության զարգացումը: Դրանք ինչ-որ չափով կլրացնեն բացերը: Քանի որ հասարակական կազմակերպությունները չեն ձգտում իշխանության, իշխանության կողմից պայքարը դրանց դեմ այդքան ուժեղ չէ: Իշխանություններն ավելի են հակված արձագանքել հ/կ ների առաջարկություններին քան` կուսակցությունների»:
Լուսինե ԲՈՒԴԱՂՅԱՆ
