Այսօր, ինչպես տեղեկացրել էինք, Գյումրիի արդեն էքսքաղաքապետ Վարդան Ղուկասյանը հանդիպման էր եկել ԱԺ նախագահ Հովիկ Աբրահամյանի հետ: Ավելի ուշ՝ հանդիպումից հետո լրագրողների հետ զրույցում պարոն Ղուկասյանը պատմեց, որ Հովիկ Աբրահամյանի հետ քննարկել են Գյումրի քաղաքի տոնի հետ կապված: Հարցին՝ Գյումրիի տոնի հետ կապված Հովիկ Աբրահամյանի հե՞տ եք հանդիպում՝ նա պատասխանեց. «Բա ոնց, հանդիպում ենք, քննարկում ենք, հրավիրում ենք, հրավիրատոմս ենք տալիս»: Երբ լրագրողները հիշեցրին, որ նա այլեւս քաղաքապետ չէ՝ Վարդան Ղուկասյանը վստահեցրեց, որ մինչեւ նոյեմբերի 12-ը քաղաքապետի լիազորություններն իր վրա են դրված:
Հարցին՝ Ձեր հետագա պաշտոնավարման հարցը չե՞ք քննարկել՝ նա պատասխանեց. «Ճիշտն ասած, ես չեմ ուզում աշխատել պետական կառույցներում: Ինձ հիմա ճանաչում եմ բիզնեսի մեջ ավելի շատ: Մի քիչ պետք է հանգստանալ»: Հարցին՝ Դուք այսքան ժամանակ պետական կառույցում եք աշխատել, բիզնեսի փորձ ո՞նց ունեք՝ նա պատասխանեց. «Ես ամբողջ կյանքս բիզնեսով եմ զբաղվել՝ դպրոցից հետո: Որ նայեք իմ կենսագրականը, կտեսնեք, որ ես շատ մե՜ծ ֆերմերներ, ֆերմերությամբ եմ զբաղվել: Մինչեւ այսօր ֆերմաներ ունեմ: Առաջին կոոպերատիվ «Սպարտակը» ես եմ ստեղծել, տրիկոտաժի, հացի արտադրամասեր: Մի խոսքով՝ որ նայեք կտեսնեք»:
Հարցին՝ Սպարտակ ասացիք՝ հիշեցինք՝ Սպարտակն ո՞ւր է, ի՞նչ եղավ՝ քաղաքապետը վստահեցրեց, որ ինքը չգիտի, թե որտեղ է Սպարտակը, որտեղից կգա, բայց որ անպայման կգա՝ դա փաստ է: Թե ինչո՞ւ է գնացել Սպարտակը՝ Վարդան Ղուկասյանը այսպես պատասխանեց. «Արջ բռնելու»:
Կարդացեք նաև
Հռիփսիմե ՋԵԲԵՋՅԱՆ
