Սամսոն Ղազարյանը կողմ է ծանուցելուն
Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Արշակ Վարդանյանի նախագահությամբ այսօր պետք է շարունակվեր Գերագույն խորհրդի նախկին պատգամավոր, «Ղարաբաղ» կոմիտեի նախկին անդամ Սամսոն Ղազարյանի դեմ հարուցված քրեական գործով նշանակված դատական նիստը: Սամսոն Ղազարյանը մեղադրվում է «խարդախությամբ նախկին ԳԽ պատգամավոր Մեխակ Գաբրիելյանից առանձնապես խոշոր չափի գումար հափշտակելու» մեջ (խոսքը մինչեւ 120 հազար դոլար գումարը տոկոսով տալու-չտալու մասին է):
Այսօր դատարան չէր ներկայացել Ս. Ղազարյանի պաշտպանը՝ ՀՀ փաստաբանների պալատի անդամ Ստեփան Ոսկանյանը, որն, ըստ Սամսոն Ղազարյանի, գնացել էր Վրաստան՝ ջավախահայ ակտիվիստ Վահագն Չախալյանի գործով: Դատարանընառանց պաշտպանի անհնար համարեց դատական նիստի շարունակումը եւ այն նշանակեց հոկտեմբերի 2-ին:
Սակայն այսօր դատարան էր ներկայացել վկա Ավագ Հարությունյանը եւ մեղադրանքի կողմը, մասնավորապես՝ մեղադրող դատախազ Սամվել Հարությունյանը, ինչպես նաեւ տուժող Գաբրիելյանի ներկայացուցիչ Հրանտ Գեւորգյանը կողմ էին, որպեսզի լսեն այդ վկային: Ի դեմ, կողմ էր նաեւ Սամսոն Ղազարյանը, որպեսզի լսեն վկային:
Կարդացեք նաև
Հրանտ Գեւորգյանը նկատեց, որ գործի ժամկետը ձգձգվում է՝ կապված փաստաբանի հետ: «Չնայած իմ կոլեգան է, էթիկայի կանոնները թույլ չեն տալիս ավելին ասել, սակայն գտնում եմ, որ սանկցիա պիտի կիրառվի նրա նկատմամբ»,- ասաց Հ. Գեւորգյանը:
Դատավորը նաեւ հայտնեց, թե պատշաճ ծանուցվել է Շանթ Հարությունյանը, որը դատարան չի ներկայացել: Շանթ Հարությունյանին բերման ենթարկելուն կողմ արտահայտվեցին մեղադրողը, տուժող Մեխակ Գաբրիելյանը եւ նրա ներկայացուցիչը: Իսկ Սամսոն Ղազարյանն ասաց. «Ծանուցեք: Իմ կողմից ինչքան պատշաճ կլինի, որ ես ասեմ՝ բերման ենթարկեք»:
Մինչ դատական նիստը հետաձգվելը՝դատավորը ներկայացրեց Սամսոն Ղազարյանին, նրա պաշտպանի՝ Ստեփան Ոսկանյանի բացատրությունները լսելուց հետո դատարանը կարտահայտնի իր դիրքորոշումը:
Ռուզան ՄԻՆԱՍՅԱՆ
