Սեպտեմբերի 26-ին «Կոնգրես» հյուրանոցի Շքասրահում տեղի ունեցավ «Pastinfo.am» իրավական, վերլուծական, տեղեկատվական կայքի շնորհանդեսը: Այն գործարկվել է օգոստոսից` Հասարակայնության հետ կապերի հայաստանյան ասոցիացիայի նախաձեռնած ծրագրի շրջանակներում` գործընկեր կազմակերպությունների հետ համագործակցությամբ և ՀՀ արդարադատության նախարարության դատաիրավական բարեփոխումների ծրագրերի իրականացման գործակալության աջակցությամբ:
Ինչպես նշեց «Հասարակայնության հետ կապերի հայաստանյան ասոցիացիա» ՀԿ-ի տնօրեն Տաթևիկ Փիրումյանը, ասոցիացիան արդեն շուրջ հինգ տարի իրականացնում է բազմաթիվ ծրագրեր իրավական ոլորտում` ուղղված հանրային իրավագիտակցության բարձրացմանը: Այս տարվա ապրիլից մեկնարկել է նաև իրազեկման ծրագիրը, որի նպատակն է ժամանակակից տեղեկատվական տեխնոլոգիաների լայն կիրառմամբ ընդլայնել հասարակության իրավագիտակցությունը, նաև դատական ակտերի, օրենսդրության և քաղաքացիական իրավունքների վերաբերյալ տեղեկացվածության մակարդակը: Ծրագրի շրջանակներում ստեղծվեց «Փաստինֆո» լրատվական գործակալությունը, իսկ օգոստոսի վերջին հասանելի դարձավ www.pastinfo.am կայքը:
«Մատչելի իրավական տեղեկատվության ապահովման հասարակական պատվերը Հայաստանում լիարժեք չի իրականացվել: Անցած 10-15 տարիներին առանձին լրատվամիջոցներ, գիտակցելով խնդրի կարևորությունը, հատուկ ուշադրություն են դարձրել դատաիրավական թեմաներին, սակայն այնպիսի լրատվամիջոց, որը կընդգրկեր իրավական բարդ ու բազմաշերտ համակարգն իր բոլոր ուղղություններով և հանրությանը ոչ միայն կտեղեկացներ, այլև իրավական գիտելիքներ կհաղորդեր, մինչ օրս չկար»,-ասաց «Pastinfo.am» կայքի գլխավոր խմբագիր Սասուն Մամյանը` ընդգծելով, որ կայքը իրավական դաշտում առկա այս բացը լրացնելու առաքելությամբ է մտել մամուլի աշխարհ:
«Փաստինֆո» տեղեկատվական հարթակի գործունեության գերակա ուղղությունը իրավական տեղեկատվության հավաքումն է, պատրաստումն ու տարածումը:
««Փաստինֆո» տեղեկատվական գործակալությունը դատաիրավական ոլորտի վերաբերյալ տեղեկատվություն է պատրաստում ու տարածում հայաստանյան յոթ տասնյակից ավելի կայքերին, տպագիր մամուլին, հեռուստաընկերություններին: Այս ձևաչափով տեղեկատվության պատրաստումը պահանջված է հասարակության կողմից, իսկ կայքն արդեն լրացնելու է գործակալության գործունեությունը»,- ասաց Ս. Մամյանը:
Հայաստանի ժուռնալիստների միության նախագահ Աստղիկ Գևորգյանը, ողջունելով նոր կայքի մուտքը լրատվական դաշտ, հույս հայտնեց, որ «Pastinfo.am»-ի աշխատակազմը կլինի անկողմնակալ, մասնագիտական, հասարակության նկատմամբ հարգանք ունեցող, օրենքով աշխատող թիմ:
«Ես շատ հույս ունեմ, որ բացի իրավական այլ խնդիրներից, կայքը մեծ տեղ կտա նաև ժուռնալիստների իրավունքների խախտման դեպքերին, և մենք կհամագործակցենք այդ ոլորտում»,-ասաց Ժուռնալիստների միության նախագահը:
Սահմանադրական դատարանի նախագահի խորհրդական Գևորգ Դանիելյանի գնահատմամբ, «իսկապես լավ նախաձեռնություն է»: Նա կարևորեց, որ կայքում ոչ միայն ուղղակի ներկայացված են օրենսդրական ակտերը, այլ նաև տրված են դրանց մեկնաբանությունները:
ՀՀ ոստիկանության իրավաբանական վարչության պետ Թաթուլ Պետրոսյանը նշեց, որ կայքն իր տեսակի մեջ առանձնանում է թե մասնագիտական և թե նյութերի մատուցման առումով: «Համոզված եղեք, որ ոստիկանությունը մեծ ուրախությամբ կհամագործակցի կայքի հետ»,- նշեց նա:
Շնորհանդեսին ներկա տարբեր գերատեսչությունների ներկայացուցիչներ ևս համագործակցության պատրաստակամություն հայտնեցին` հաջողություններ մաղթելով նորաստեղծ լրատվամիջոցին:
