Քաղաքագետ Սերգեյ Մինասյանի գնահատմամբ, Հայաստանում անցկացված վերջին ՏԻՄ ընտրությունները տարբերվում են նախորդ տարիների ընտրություններից ավելի բաց ու մրցակցային լինելու հանգամանքով: «Համենայնդեպս առնվազն 10 տարվա առաջվա ընտրությունները չեն: Ներկայումս ունենք ավելի բաց, չեմ ասի, այդքան էլ ժողովրդավարական, բայց տեղական ինքնակառավարման ընտրությունների ժամանակ կա լուրջ մրցակցություն: Այն փաստը, որ նշանակություն ունեն ինչ-որ ձայներ գնելը, չակերտավոր դրական գործընթաց է, որովհետեւ կարող էր լինել ձայներ պարզապես գրելը կամ հաշվի չառնելը: Այն , որ տարածաշրջաններում տեղական էլիտաների միջեւ կա մրցակցություն , բավականին կարեւոր փոփոխություն է»,- Aravot.am-ին ասաց քաղաքագետը:
Քաղաքագետը դժվարացավ պատասխանել, թե ՏԻՄ ընտրությունների ժամանակ այս կամ այն կուսակցության թեկնածուի համար «ձայն գնելը» կարո՞ղ է կանխորոշել, թե նախագահական ընտրություններում ով ում կսատարի:
Իսկ Գյումրիում քաղաքապետի թեկնածուի մասով ՀՀԿ-ԲՀԿ համաձայնությանն անդրադառնալով էլ , պարոն Մինասյանը հավելեց, որ Գյումրիի քաղաքապետ ընտրվելուն ԲՀԿ թեկնածու Սամվել Բալասանյանին նպաստել է նաեւ անձնական գործոնը. «Բալասանյանը ոչ միայն ԲՀԿ թեկնածու էր, այլ նաեւ վերնախավում հայտնի, խորհրդարանում փոխխոսնակ էր : Իր անձնական գործոնն այլ ձեւով դեր խաղաց ու պարզեցված՝ ՀՀԿ-ԲՀԿ պատկերից առանձնանում էր»:
Կարդացեք նաև
Արփինե ՍԻՄՈՆՅԱՆ
