Նախկին փաստահավաք խմբի անդամ Անդրանիկ Քոչարյանը երեկ դեմ էր արտահայտվել Հայ ազգային կոնգրես խորհրդարանական խմբակցության՝ խորհրդարանում «Մարտի 1»-ի գործով նոր ժամանակավոր հանձնաժողով ստեղծելու նախաձեռնությանը։ Պրն Քոչարյանը պատճառաբանել էր, որ դրա աշխատանքներն ի սկզբանե դատապարտված են լինելու նախորդ ժամանակավոր հանձնաժողովի աշխատանքների ճակատագրին, ինչպես նաեւ հորդորել էր ՀԱԿ-ականներին հետամուտ լինել երկխոսության ընթացքում իշխանության տված «Մարտի 1»-ը բացահայտելու խոստման իրականացմանը։
Aravot.am-ի հարցին՝ տեղյա՞կ է ինքը, թե ինչ խոստում է տրվել երկխոսության ժամանակ եւ ինչո՞ւ ՀԱԿ-ը հետամուտ չի լինում իշխանության կողմից դրա կատարման համար, ՀԱԿ խմբակցության անդամ, նախաձեռնության հեղինակ Գագիկ Ջհանգիրյանն այսպես արձագանքեց. «Երկխոսության դետալներից տեղյակ չեմ, գուցե Քոչարյանն ավելի տեղեկացվա՞ծ է»: Գագիկ Ջհանգիրյանը նկատեց, որ Անդրանիկ Քոչարյանը բավականին ակտիվ է աշխատել Փաստահավաք խմբում եւ քննադատել է Նիկոյանի ղեկավարած հանձնաժողովը. «Ինչո՞ւ է կտրուկ փոխվել, պետք է իրեն հարցնել»:
Նելլի ԳՐԻԳՈՐՅԱՆ
