Հայաստանում շատացել են վիժման դեպքերը. այսօր լրագրողների հետ հանդիպման ժամանակ ասաց գինեկոլոգ Գեորգի Պողոսյանը՝ պատճառաբանելով փաստը. «Բանն այն է, որ հիմա ծննդաբերում է այն սերունդը, որը մեծացել է մութ տարիներին, նրանց մոտ իմուն համակարգը հիմնադրվել է վատ տարիներին: Այսինքն այն ժամանակ, երբ նորմալ սնունդ չկար, լույս չկար, նոր տարին՝ տոն չէր, կյանքի բնականոն ընթացքը խախտված էր»,- ասաց Պողոսյանը, ըստ որի՝ վիրուսային ինֆեկցիաները, որոնք ապրում են մեր մեջ, գլուխ են բարձրացնում այն դեպքում, երբ իջնում է դիմադրողականությունը, ինչն էլ ազդում է վիժման դեպքերի ավելացմանը, կամ՝ հղիության փոքր, կամ մեծ ժամկետների խախտմանը, արատավոր, հիվանդ երեխաներ ծնվելուն:
Պողոսյանի ձեւակերպմամբ՝ վիժման դեպքերի առիթ է հանդիսանում նաեւ տարբեր տեսակի դիետաների դիմելը. «Կանայք գերադասում են նիհարել ոչ թե սպորտի գնալով, այլ «դիվան քշելու» հաշվին»:
Ինչ վերաբերվում է տղամարդկանց անպտղությանը, ապա ըստ գինեկոլոգի, շատ են դեպքերը, երբ սերմը վնասվում է սթրեսների, սեռավարակների պատճառով, նաեւ այն դեպքում, երբ տղամարդիկ սկսում են վատ ապրել սեռական կյանքով, ամուսնության սկզբից:
Եվա ՀԱԿՈԲՅԱՆ
