Այսուհետ Վանաձորի ավագանու նորընտիր անդամ Արկադի Փելեշյանի նախընտրական շտաբն ու նրան աջակցող քաղաքացիները հնարավորություն կընձեռեն վանաձորցիներին ստանալու անվճար իրավաբանական, բժշկական, մանկավարժական օգնություն:
Առաջին անգամ ավագանու անդամության թեկնածություն դրած ու 52 թեկնածուներից ամենաշատ ձայներ հավաքած Արկադի Փելեշյանը ոգեւորված է:
Նա կարծում է, որ թեեւ ավագանու աշխատանքը վարձատրվող չէ, այնուամենայնիվ, նրա համար քաղաքացիների գոհունակության արժանանալը ամենամեծ վարձատրությունն է:
Կարդացեք նաև
«Օգնելու ենք բոլոր այն քաղաքացիներին, ովքեր իրենց խնդիրներով կդիմեմ մեզ, աչքաթող չենք անելու ոչ ոքի խնդիրը, ինչով կարողանանք, աջակցելու ենք: Այսուհետ քաղաքացիները կարող են նաեւ դիմել գրասենյակ, ու ստանալ անվճար իրավաբանական խորհրդատվություն, ինչպես նաեւ մեր թիմում կան մանկավարժներ, ակնաբույժ, ովքեր անվճար կաջակցեն մարդկանց»:
Քաղաքացիներից ամենաշատ ձայներ հավաքած ավագանու անդամը չի զարմանում իր այդօրինակ հաղթանակի առիթով:
Նա նշում է, որ, թեեւ նախընտրական գովազդ, բուկլետ չի ունեցել, այնուամենայնիվ, դա չի խանգարել քաղաքացիներին վստահելու իրեն:
«Մենք նախընտրական որեւէ բուկլետ չենք պատրաստել, գովազդ չենք արել այն նկատառումներից ելնելով, որ ավագանուն պետք է ընտրեն իրեն ճանաչողները, ոչ թե նոր պետք է ճանաչեն, ու ընտրեն: Այսինքն` ոչ թե պիտի գովազդես, որ քեզ ընտրեն, այլ իմացողը պիտի ընտրի քեզ»:
Իր հաղթանակի գաղտնիքը, ըստ նրա, իրեն շրջապատող մարդկանց սրտացավությունն ու մտերմությունն է:
«Ես ունեմ շատ լավ ընկերներ, հարեւաններ, բարեկամներ, ես զգում էի, որ ինձ քաղաքացիները ընդունում են, եւ նրանց` ինձ ընդունելը դրդեց, որ ես թեկնածությունս դնեմ: Ամեն ինչ անելու եմ` արդարացնելու համար վանաձորցիների ակնկալիքները»:
Անուշ Բուլղադարյան
Վանաձոր
