ՀԱԿ ակտիվիստ Վարդգես Գասպարին ԱԺ էթիկայի հանձնաժողովում Սամվել Ալեքսանյանի դեմ իր դիմումը քննելու նախաձեռնությունից սպասելիքներ չունի: «Մեծ հույսեր չունեմ: Իշխանությունը առայժմ ձեւեր է անում, արեւմտահաճո ձեւեր: Չեմ կարծում, որ Ալեքսանյանի մանդատը վայր դնելու համար սկզբունքայնություն կդրսեւորի»,- կարծիք հայտնեց պարոն Գասպարին:
Հիշեցնենք, որ երեկ ԱԺ էթիկայի հանձնաժողովի նախագահ Նիկոլ Փաշինյանը լրատվամիջոցներին ասել էր, որ կան դեպքեր, երբ պատգամավորը էթիկայի հանձնաժողովի որոշման հիման վրա կարող է զրկվել պատգամավորական մանդատից:
Պարոն Գասպարին նաեւ հավելեց, որ հանձնաժողովում իր դիմումի քննությունը Ալեքսանյանին կդրդի հաջորդ անգամ ոչ թե անձամբ, այլ թիկնապահներին ուղարկել ցուցարարների ձեռքից պաստառը վերցնելու:
Հիշեցնենք, որ հունիսի 17-ին Ազգային ժողովի շենքի մոտ Վ. Գասպարին բողոքի ակցիա էր կազմակերպել «Հարսնաքարում» տեղի ունեցած միջադեպի հարցով ԱԺ արտահերթ նիստ հրավիրելու պահանջով: ԱԺ-ից դուրս գալիս Ս. Ալեքսանյանը Գասպարիից խլել էր «Ռուբեն Հայրապետյան՝ մարդասպան» բովանդակությամբ պաստառը: Իսկ քիչ հետո, Գասպարիի պատմելով, նրա թիկնապահը իրեն տապալել էր գետնին:
Կարդացեք նաև
Արփինե ՍԻՄՈՆՅԱՆ
