Հանդիպումները լինում են տարբեր` սիրային, գործնական, ընտանեկան, ընկերական և այլն: Սակայն յուրաքանչյուր հանդիպում ունի իր ուրույն վարվելակերպի և հագնվելու կանոնները, որոնց անհրաժեշտ է հետևել: Այսպես, օրինակ` սիրային առաջին հանդիպման ժամանակ այն պետք է կազմակերպել հասարակական` մարդաշատ վայրերում (ռեստորան, կինոթատրոն և այլն), որտեղ ձեզ լարված չեք զգա և շրջապատված կլինեք հաճելի մթնոլորտով: Իսկ ընկերական հանդիպման ժամանակ նպատակահարմար է աշխույժ ներգրավել դրկիցներին (կամ դրկիցին) զրույցում և մտերմություն հաստատել նրանց հետ` առանց որևէ ստիպողականության կամ կոպտության:
Մասնագետներն առաջին հանդիպման ժամանակ անհրաժեշտ են համարում հաշվի առնել հետևյալ կանոնները.
1Լինել ճշտապահ և պարտաճանաչ, քանի որ ուշացողները շատ բան կարող են կորցնել ժամանակին հանդիպման վայր չհասնելու պատճառով` դրանով իսկ կորցնելով դիմացինի վստահությունն ու հարգանքը:
2. Անհրաժեշտ է հագնել պատշաճ հագուստ, որը կհամապատասխանի տվյալ միջավայրին: Օրինակ` խնջույքի, երեկոյան զբոսանքի կամ նմանատիպ այլ առիթների պարագայում անհրաժեշտ է հագնել թեթև և ոչ այնքան ճշացող հագուստ` խուսափելով անհարմար, կիսակեղտոտ, անարդուկ հագուստներից: Տպավորություն ստեղծեք, որ ջանք եք գործադրել` յուրահատուկ տեսք ունենալու համար:
3. Խոսեք հանգիստ և մեղմ ձայնով: Հարցեր տվեք զրուցակցին, ցույց տվեք, որ հետաքրքրված եք նրանով և խուսափեք սեփական անձը գովերգելուց և անընդհատ զրույցն ընդհատելուց:
4. Հաճախ լսեք և ժպտացեք, քանի որ ժպիտը և´ գեղեցիկ է, և´ քաղաքավարի: Իսկ լսելով ավելի շատ բան կարելի է իմանալ տվյալ անձի մասին:
5. Խուսափեք բացասական կամ ձանձրույթ առաջացնող տրամադրվածությունից: Զրուցեք բաց և անմիջական` առանց սեփական անձը սկուտեղին մատուցելու, այլապես զրուցակիցը կկորցնի ձեր անձի հանդեպ հետաքրքրությունը:
6. Եղեք վստահ և անկաշկանդ: Ամեն դեպքում վախերը լավ բանի չեն բերում:
7. Ուշադրություն դարձրեք Ձեր և զրուցակցի շարժուձևին և դիմախաղին: Սակայն եթե չեք տիրապետում հոգեբանական այդ հնարքներին, «ականջ դրեք» Ձեր ներքին ձայնին: Օրինակ` թաքցրած ձեռքերը մատնում են անվստահ և պասիվ անձանց, իսկ դեպի աջ վերև հառած աչքերը խոսում են ստի կամ ոչ ազնիվ խոսակցության մասին:
8. Ջերմ բռնեք նրա ձեռքը/ձեռքերը և ժամանակ առ ժամանակ կրկին ժպտացեք:
9. Մի նստեք զրուցակցի դիմաց: Հոգեբանների պնդմամբ, սիրային հանդիպման ժամանակ զույգերը պետք է նստեն կողք կողքի, որպեսզի նրանց միջև սահմանագիծ չլինի:
10. Լիցքաթափվեք և մի լարվեք: Եվ, ի վերջո, գրկեք անգրկելին:
Վարվելակերպի չգրված օրենքներն ու կանոննորը կարող են անվերջ շարունակվել` երբեմն էլ մեկը մյուսին հակասելով, սակայն արժե հիշել, որ դրանցից ամենակարևորը ինքներս մեզ հետ ազնիվ լինելն է:
Ելենա Չոբանյան
