ՄԱԿ-ի Գլխավոր ասամբելան այսօր շարունակում է իր տարեկան ամփոփիչ բանավեճը, որի ընթացքում քննարկվում են մարդու հիմնարար իրավունքների և ազատությունների, օրենքի գերակայությանն առնչվող հարցեր:
Aravot.am-ը շարունակում է հետևել քննարկումներին:
ՄԱԿ-ի անդամ երկրների ներկայացուցիչների քննարկման թեմաներից մեկն էլ կանանց ներգրավվածության աստիճանի բարձրացումն էր իրավական համակարգում, ինչը, ըստ նրանց՝ հնարավորություն կտա հաղթահարել գենդերային խտրականությունն ու կապահովի գենդերային հավասարություն:
Տանզանիայի ներկայացուցիչը, խոսելով իրավական համակարգում կանանց ներգրավվածության թեմայի մասին, նշեց, որ այս հարցի քննարկման ընթացքում իր աչքի առաջ եկան բոլոր այն կանայք, որոնք տուժել են տարբեր ահաբեկչությունների և բռնությունների ընթացքում, այդ թվում նաև սեռական բռնությունների ժամանակ:
Կարդացեք նաև
Կանանց՝ իրավական համակարգում ներգրավվածության թեմայի շուրջ տպավորիչ էր նաև ՄԱԿ-ի գլխավոր քարտուղար Պան Գի Մունի ելույթը, որի ընթացքում նա հայտարարեց. «Կանայք միայն զոհեր չեն, նրանք արդարադատության չեմպիոններն են»:
Այնուհետև քննարկվեցին այն հիմնական քայլերը, որոնք պետք է կատարեն ՄԱԿ-ի անդամ երկրները, որպեսզի նպաստեն իրավական ոլորտում կանանց ներգրավվածության աստիճանի բարձրացմանը: Ըստ այդմ՝ պետք է հեղինակել օրենքներ, որոնք վերաբերում են մասնավորապես կանանց և աղջիկների իրավունքների պաշտպանությանը, բարձրացնել իրավական համակարգում կանանց ներգրավվածության աստիճանը և հասնել այն իրավիճակին, որ տվյալ երկրի օրենսդրական նախաձեռնությունները վերաբերեն կանանց իրավունքների պաշտպանությանը, նրանց դեմ բռնությունների կանխմանը:
ՄԱԿ-ի Կանանց հարցերով պատասխանատու Միշել Բաշելեն էլ հայտարարեց, որ ինչպես ցույց են տալիս իրենց վերլուծությունները, աշխարհում 10 կանանցից 8-ը երկրի արդարադատության համակարգին դիմելու հարցում կամ դժվարություններ ունի, կամ ընդհանրապես մուտքի իրավունք չունի այդ համակարգ: Նա մանրամասնեց. «Հաճախ, մենք կանանց դուրս ենք թողնում օրենքի շրջանակներից: Ես եղել եմ աշխարհի տարբեր երկրներում, և հասկացել մի բան՝ որտեղ էլ լինի, Եվրոպայում, Ասիայում, թե Աֆրիկայում, կանայք հոգնել են արդարադատության սպասելով»: Նա նաև հավելեց, որ աշխարհի 100 երկրում դեռ պահպանվում են գենդերային խտրականությունները իրավական ոլորտում և օրենքի գերակայությունից օգտվելու բնագավառում: Օրինակ՝ շատ երկրներում կանայք իրավունք չունեն պայմանագիր ստորագրել, արտասահմանյան ճամփորդությունների մեկնել, սեփականություն ունենալ:
Այնուհետև տիկին Բաշելեն ներկայացրեց կոնկրետ թվային փաստեր. «Ավստրալիայում, Կանադայում, Իսրայելում, Հարավային Աֆրիկայում կանանց 40-70 տոկոսը մահանում է իր զուգընկերոջ կողմից ստացած բռնությունների արդյունքում: Օրինակ՝ Գվատեմալայում օրական միջինը երկու կին սպանվում է»:
Տաթև ՀԱՐՈՒԹՅՈՒՆՅԱՆ
