«Առավոտ երիտասարդականը» սկսում է նոր շարք, որտեղ կանդրադառնանք Հայաստանից դուրս ապրող հայ երիտասարդներին, նրանց խնդիրներին, հոգսերին և կպատմենք նրանց մասին: Մեր առաջին հերոսը Մալթայում բնակվող 21-ամյա նկարիչ Լևոն Գուրջինյանն է:
Լևոն Գուրջինյանը 10 տարեկան էր, երբ ընտանիքի հետ լքեց Հայաստանը: 6 տարի Ռուսաստանում ապրելուց հետո ընտանիքի հետ մեկնում է Մալթա, որտեղ էլ մինչև այսօր բնակվում է: Այժմ 21 տարեկան է: Սովորում է Մալթայի MCAST ինստիտուոտում՝ արվեստ և դիզայն բաժնում: Նկարել շատ է սիրում, որպես հայ նկարիչ մասնակցել է տարբեր ցուցահանդեսների, մրցույթների. «Դեռ փոքր տարիքից նկարելու հանդեպ մեծ սեր ունեի»: Բացի նկարչությունից՝ մեծ հետաքրքրություն ունի նաև սպորտի, քաղաքականության և պատմության հանդեպ: Ժամանակին զբաղվել է ֆուտբոլով:
Հիշում է`երբ նոր էր տեղափոխվել Մալթա, դժվարությունների հաճախ էր հանդիպում. «Շատ էր պատահում, որ կռիվներ էի անում: Եվրոպայում չէի հասկանում`ինչպե՞ս կարող է մարդ իրեն այդպես պահել: Բայց ժամանակ անցավ ու ընտելացա: Հիմա շատ հանգիստ եմ ապրում, առանց պրոբլեմների»,- ասում է նա: Խորհուրդ է տալիս բոլոր այն երիտասարդներին, ովքեր ապրում են արտասահմանում. «Մարդ պետք է ընտելանա այն երկրի մենթալիտետին, որտեղ ապրում է, բայց չպետք է մոռանա`ով է ինքն իրականում»:
Լևոնը որոշել է վերադառնել Հայաստան. «Մալթան շատ փոքր երկիր է: Այն խնդիրները, որն ունի Հայաստանը, Մալթան չունի: Մեր մոտ դժվար է ապրելը, Մալթան մենաշնորհային երկիր է, դա շատ մեծ խնդիր է հասարակ մարդկանց համար: Երևի շուտով`ամենաշատը մեկ տարուց, ես կգամ Հայաստան ապրելու: Այդ միտքը փոքր ժամանակից մտքումս է, և ամեն ինչ անում եմ, որ այդ երազանքը դառնա իրականություն: Հայաստանում մնացել են իմ բարեկամները, որոնց շատ եմ կարոտել: Եղբայրներս երեխաներ են ունեցել, որոնց չեմ տեսել»,- ասում է նա: Նաև թվարկում է այն ամենը, ինչը շատ է կարոտել` հայկական բնությունը, ճարտարապետությունը, վանքերը, խոհանոցը:
Լևոնի խոսքով՝ Մալթայում երիտասարդական կազմակերպություն չկա. «Այստեղ շատ քիչ հայեր են բնակվում»,- ասում է նա: Չնայած հայ համայնքի փոքր լինելուն՝ միջոցառումներ Մալթայում, անուամենայնիվ, հայերը կազմակերպում են. «Մի քանի տարի առաջ խաչքար ենք դրել Մալթայի մայրաքաղաքում, շատ ուշադիր ենք հայ սպորտսմենների նկատմամբ»:
Լեւոն Գուրջինյանը Մալթայում Հայաստանի հավաքականին նվիրեց իր հեղինակած նկարը
Ուշադիր ֆուտբոլասերները, կհիշեն Լևոնին. նա այն երիտասարդն է, ով Մալթայում Հայաստանի հավաքականին նվիրեց իր հեղինակած նկարը. «Ես շատ եմ հավանում մեր հավաքականին և նրա մեծ երկրպագուն եմ, ծանոթ եմ որոշ խաղացողներին, բժշկին և Վարդան Մինասյանին: Որոշեցի նվեր անել նրանց»,- պատմում է Լեւոնը:
«Առավոտ երիտասարդականը» Լևոնին իր գործերում հաջողություն է մաղթում և սպասում նրան Հայաստանում:
Լիլիթ Սարգսյան
