«ՀԱՅ ՖԵՍՏ» միջազգային թատերական փառատոնն այս տարի տոնում է իր 10-ամյակը: Փառատոնի նախագահ Արթուր Ղուկասյանն այսօր Press Master ակումբում հայտնեց, որ այս տարի «ՀԱՅ ՖԵՍՏ»-ը Երևանում կկայանա հոկտեմբերի 2-9-ը՝ NEVER MISS կարգախոսով: Փառատոնի կազմակերպմանն աջակցում է ՀՀ մշակույթի նախարարությունը:
«Փառատոնը կմեկնարկի ճապոնացի թմբուկահարների ելույթով: Ծրագիրը հետաքրքրական է, ներառում է վարպետության դասեր` այդ թվում դերասանի վարպետություն, բեմական խոսք, վոկալ, ինչպես նաեւ` Վրաստանի հետ համատեղ կազմակերպված մշակութային պլատֆորմ: Կլինեն հյուրեր տարբեր երկրներից ու փառատոններից»,-ասաց Ղուկասյանը եւ հավելեց, որ չնայած 10-ամյա պատմությանը` «ՀԱՅ ՖԵՍՏ»-ը չի պառավել:
Ղուկասյանի խոսքով` այս տարվա փառատոնը տարբերվում է նրանով, որ ռուսական թատերական խմբեր չկան. «Խմբերի մասնակցությունը տեղի է ունենում այն ժամանակ, երբ երկու կողմերն են ջանք գործադրում գալու համար. մենք ուզում էինք, որ ռուսները գան, բայց որոշ ֆինանսական խնդիրների պատճառով նրանց այցը չստացվեց: Իսկ ինչ վերաբերում է նրան, որ Ռուսաստանը մեր դաշնակից երկիրն է, ասեմ, որ փառատոնը ոչ թե ռուսական է, այլ հայկական է: Ցանկալի կլիներ ռուսների մասնակցությունը, որովհետեւ ռուսական թատրոնն աշխարհում երկրորդն է»:
Կարդացեք նաև
Մարզային ելույթների վերաբերյալ «ՀԱՅ ՖԵՍՏ»-ի նախագահն ասաց. «Դրանք ծախսատար են: Գյումրիից մի ակտիվ երիտասարդ կար` Տիգրան անունով, ով ուզում էր, որ մենք գնայինք Գյումրի: Ուրախալի է, որ նման երիտասարդ կա, սակայն նա մարզպետը չէ: Բացի այդ, խմբերը Երեւան են ժամանում ընդամենը երեք օրով»:
Հավելենք, որ փառատոնի ընթացքում հանդես կգա 25 թատերական և պարային խումբ` 18 երկրից, այդ թվում` Եվրոպայից, Ճապոնիայից, Ռուսաստանից, Իրանից, Վրաստանից: Փառատոնի օրերին հանդիսատեսը հնարավորություն կունենա դիտել այնպիսի տաղանդավոր և հայտնի թատրոնների ներկայացումները, ինչպիսին են Լա Գոլուզ Թատրոնը Ֆրանսիայից, Թումանիշվիլու Կինոյի Դերասանի Թատրոնը Վրաստանից, Դադադադան Տենկոն Ճապոնիայից և այլն:
Լուիզա ՍՈՒՔԻԱՍՅԱՆ
