Ինչպես արդեն տեղեկացրել ենք, Նյու Յորքում ՄԱԿ-ի Գլխավոր ասամբլեան բացեց իր 67-րդ նստաշրջանը: Մեկ շաբաթվա աշխատանքների շրջանակներում այսօր, այս պահին տեղի է ունենում տարեկան ամփոփիչ բանավեճ, որի ընթացքում Գլխավոր ասամբլեան լսում է անդամ պետությունների ղեկավարների և կառավարությունների հայտարարությունները: Յուրաքանչյուր երկիր քննարկման ընթացքում հանդես է գալիս իր ներկայացուցիչով, որը 15 րոպեի ընթացքում ներկայացնում է իրենց երկրում գոյություն ունեցող հիմնախնդիրները:
ՄԱԿ-ում քննարկումները այս պահին ծավալվում են օրենքի գերակայության և միջազգային իրավունքի հարցերի շուրջ: Տարբեր երկրների ներկայացուցիչներ հաստատեցին, որ մարդու իրավունքները, օրենքի գերակայությունն ու միջազգային իրավունքը այն հարցերն են, որոնք միավորում են ՄԱԿ-ի անդամ երկրներին:
ՄԱԿ-ի գլխավոր քարտուղար Պան Գի Մունն էլ նշեց. «Մենք կոչ ենք անում բոլոր երկրներին հարգել օրենքի գերակայությունը և փորձել խնդիրները լուծել բացառապես խաղաղ ճանապարհով»: Նա նաև նշեց, որ անդամ երկրներն ունեն հավասար հնարավորություններ՝ իրենց երկրներում ներդնել բոլոր այն գաղափարները և ի կատար ածել ՄԱԿ-ի բոլոր այն պահանջները, որոնք ուղղված են միջազգային իրավունքի նորմերի բարելավմանը:
Կարդացեք նաև
Իսկ ՄԱԿ-ի Գլխավոր ասամբլեայի նախագահ Վուկ Ջերեմիկը նկատեց, որ միջազային իրավունքը դեռ մի հասկացություն է, որն ավելի շատ ուտոպիա է հիշեցնում և ավելի խիստ տոնով նշեց. «Մենք խստորեն հետևում ենք օրենքի գերակայության ապահովմանն ու միջազգային իրավունքի նորմերի շրջանակներում երկրների գործունեությանը: Մենք դատապարտում ենք պատերազմը: ՄԱԿ-ի անդամ բոլոր երկրներն էլ այս բնագավառի թերացումներում ունեն իրենց մեղքի բաժինը, հարուստ թե աղքատ, խոշոր թե փոքր»:
UNDP-ի կոորդինատոր Հելեն Քլարքը, ում աշխատանքային խումբն աշխատել է օրենքի գերակայությանն ուղղված բարեփոխումների շրջանակներում, շուրջ 100 երկրներում, նկատեց. «Օրենքի գերակայությունը բոլոր բարեփոխումների սիրտն է»:
Իսկ ՄԱԿ-ի մարդու իրավունքների գծով հանձնակատար Նեվի Փիլայն ասաց. «Առանց մարդու իրավունքների պաշտպանության, օրենքի գերակայությունը դատարկ խխունջ է: Օրենքի գերակայության ապահովումը պետք է հիմնված լինի միմիայն մարդու հիմնարար իրավունքների և ազատությունների վրա»:
Տաթև ՀԱՐՈՒԹՅՈՒՆՅԱՆ
