ՖՈՏՈԼՈՒՐ
Խաղաղ պայմաններում զոհված զինծառայողների ծնողները պահանջում են ստեղծել իրենց որդիների մահվան հանգամանքներն ուսումնասիրող Ազգային ժողովի ժամանակավոր հանձնաժողով: Այս հարցով իրենք դիմել են ԱԺ բոլոր մշտական հանձնաժողովներին: Տարբեր տարիներին բանակում մահացած զինծառայողների մոտ մեկ տասնյակ ծնողներ իրենց այս պահանջը վերահաստատել են նաև ԱԺ մարդու իրավունքների պաշտպանության և հանրային հարցերի մշտական հանձնաժողովի փոխնախագահ, ՀՀԿ անդամ Մարգարիտ Եսայանի նախաձեռնությամբ սեպտեմբերի 24-ին խորհրդարանում կայացած հանդիպման ժամանակ:
Որդեկորույս ծնողները խնդրել են պատգամավորին աջակցել նշված հանձնաժողովի ստեղծման հարցում` ընդգծելով, որ իրենց միակ ցանկությունն արդարության հաստատումն է, իրենց զավակների մահվան իրական մեղավորների արդար պատիժը: Մ.Եսայանը խոստացել է աջակցել ծնողներին` իրենց նախաձեռնություններում և բարոյապես սատարել թե’ որպես քաղաքացի, թե’ որպես ԱԺ պատգամավոր:
